2026ല്‍ വിജയ് തമിഴ്‌നാടിന്റെ മുഖ്യമന്ത്രി ആകുമെന്ന് നടന്‍ പ്രേംജി അമരന്‍. ഹിന്ദുസ്ഥാന്‍ ടൈംസിന് നല്‍കിയ അഭിമുഖത്തിലാണ് പ്രേംജി അമരന്‍ സംസാരിച്ചത്. താന്‍ വിജയ്ക്ക് വോട്ട് ചെയ്യുമെന്നും കാത്തിരുന്ന് കാണുമെന്നും പ്രേംജി അമരന്‍ പറയുന്നുണ്ട്.
‘2026-ലെ തിരഞ്ഞെടുപ്പില്‍ ഞാന്‍ തീര്‍ച്ചയായും വിജയ്ക്ക് വോട്ട് ചെയ്യും. 2026-ല്‍ വിജയ് തമിഴ്‌നാട് മുഖ്യമന്ത്രിയാവുമെന്ന് ഞാനുറപ്പുനല്‍കുന്നു. കാത്തിരുന്ന് കാണാം” എന്നാണ് പ്രേംജി പറയുന്നത്. വിജയ് ആണോ അജിത്ത് ആണോ ഇഷ്ടതാരമെന്ന് ചോദിച്ചപ്പോള്‍ ഇവര്‍ രണ്ടുപേരുമല്ല എന്നാണ് പ്രേംജിയുടെ മറുപടി.
രജനികാന്തിനെയാണ് ഇഷ്ടമെന്നാണ് നടന്റെ മറുപടി. രജനികാന്താണ് തന്റെ എക്കാലത്തെയും പ്രിയപ്പെട്ട നടന്‍. അജിത്തിനേയും വിജയ്‌യേയും ഇഷ്ടമാണ്. അതിലൊരു സംശയവുമില്ല. പക്ഷേ സൂപ്പര്‍സ്റ്റാര്‍ എല്ലാവര്‍ക്കും മുകളിലാണ് എന്നും പ്രേംജി പറഞ്ഞു.
അതേസമയം, സംഗീത സംവിധായകനായും നടനായും ഗായകനായുമെല്ലാം പ്രേക്ഷക പ്രീതി നേടിയ തമിഴ് നടനാണ് പ്രേംജി അമരന്‍. വല്ലവന്‍, തോഴാ, സന്തോഷ് സുബ്രഹ്‌മണ്യം, ചെന്നൈ 600028, സരോജ, ഗോവ, മങ്കാത്ത, മാസ് തുടങ്ങി നിരവധി തമിഴ് ചിത്രങ്ങളില്‍ അഭിനയിച്ചു.
നോര്‍ത്ത് 24 കാതം എന്ന ചിത്രത്തിലൂടെ മലയാളത്തിലുമെത്തി. തോഴാ, മാങ്കാ, സോംബി, കസഡ തപറാ, മന്മഥ ലീലൈ, പാര്‍ട്ടി തുടങ്ങിയ ചിത്രങ്ങള്‍ക്കായി ഈണമിട്ടു. വിജയ് നായകനാവുന്ന ഗോട്ട് ആണ് പ്രേംജിയുടേതായി ഇപ്പോള്‍ പുറത്തിറങ്ങിയിരിക്കുന്ന പുതിയ ചിത്രം.