കേന്ദ്ര ആരോഗ്യമന്ത്രി ഹര്‍ഷവര്‍ദ്ധനെ രൂക്ഷമായി വിമര്‍ശിച്ച് നടന്‍ സിദ്ധാര്‍ഥ്. നിങ്ങള്‍ കൊവിഡ് പോരാളിയല്ല, കൊവിഡിന്റെ സഖ്യകഷിയയാണെന്ന് സിദ്ധാര്‍ഥ് ട്വീറ്റ് ചെയ്തു. ആരോഗ്യമന്ത്രി മുന്‍പ്രധാനമന്ത്രി മന്‍മോഹന്‍ സിംഗിന് അയച്ച കത്ത് പങ്കുവെച്ചു കൊണ്ടാണ് സിദ്ധാര്‍ഥിന്റെ പ്രതികരണം.
“”നിങ്ങള്‍ ഒരിക്കലും ഒരു കോവിഡ് പോരാളിയല്ല. മറിച്ച് കോവിഡിന്റെ സഖ്യകക്ഷിയാണ്. തിരഞ്ഞെടുപ്പ് വിജയിക്കാന്‍ എന്തു വില കൊടുത്തും ആളെ കൊല്ലൂ. എന്നിട്ട് മത ചടങ്ങുകളുടെ പേരില്‍ ജനങ്ങളെ വീണ്ടും കൊല്ലൂ. ചരിത്രം ഇത് ഒരിക്കലും മറക്കുകയോ പൊറുക്കുകയോ ചെയ്യില്ല”” എന്നാണ് സിദ്ധാര്‍ഥിന്റെ ട്വീറ്റ്.
രാജ്യത്ത് കോവിഡ് സാഹചര്യങ്ങള്‍ നിയന്തിക്കുന്നതിനായി അഞ്ച് നിര്‍ദേശങ്ങള്‍ ചൂണ്ടിക്കാട്ടി മുന്‍ പ്രധാനമന്ത്രി മന്‍മോഹന്‍ സിംഗ് പ്രധാനമന്ത്രി നരേന്ദ്രമോദിക്ക് കത്ത് അയച്ചിരുന്നു. ഈ കത്തിനാണ് ആരോഗ്യമന്ത്രി ഹര്‍ഷവര്‍ദ്ധന്‍ മറുപടി നല്‍കിയത്.
അതേസമയം, രാജ്യത്ത് കോവിഡിന്റെ രണ്ടാം തരംഗം അതിവേഗത്തില്‍ വ്യാപിച്ചു കൊണ്ടിരിക്കുകയാണ്. പ്രതിദിന മരണനിരക്ക് ആയിരത്തിന് മുകളിലാണ്. തുടര്‍ച്ചയായ അഞ്ച് ദിവസവും രണ്ടര ലക്ഷത്തിന് മുകളിലാണ് പ്രതിദിന രോഗബാധിതരുടെ എണ്ണം.