നടനും തിരക്കഥാകൃത്തുമായ ശ്രീനിവാസന്‍ തന്റെ പുകവലിശീലത്തെ കുറിച്ച് പലപ്പോഴും തുറന്നു പറഞ്ഞിട്ടുള്ളയാളാണ്. പുകവലി ആരോഗ്യത്തെ ദോഷകരമായി ബാധിച്ചപ്പോഴും ഉപേക്ഷിക്കാന്‍ ശ്രീനിവാസന്‍ തയ്യാറായിരുന്നില്ല. എന്നാലിപ്പോള്‍ പുകവലി ശീലം എന്നന്നേക്കുമായി ഉപേക്ഷിച്ചിരിക്കുകയാണ് ശ്രീനിവാസന്‍.
“ഇനി ഞാന്‍ വലിക്കില്ല. കാരണം വലിയാണ് എന്നെ രോഗിയാക്കിയത്. ഒട്ടേറെ ആരോഗ്യപ്രശ്‌നങ്ങള്‍ അതെനിക്ക് ഉണ്ടാക്കി തന്നു. ഇനി വലിച്ചാല്‍ രക്ഷയില്ലെന്നാണ് ഡോക്ടര്‍മാരും പറഞ്ഞത്. അതു കൊണ്ട് ഇനി വലിക്കില്ല.” ശ്രീനിവാസന്‍ മനോരമയുമായുള്ള അഭിമുഖത്തില്‍ പറഞ്ഞു. പുക വലിക്കുന്നവരോടുള്ള ഉപദേശമായി ഇതു കാണാമോ എന്ന ചോദ്യത്തിന് ഉപദേശമൊന്നുമല്ല, സമയമാകുമ്പോള്‍ എല്ലാവരും നിര്‍ത്തിക്കോളും എന്നാണ് ഒരു ചിരിയോടെ ശ്രീനിവാസന്‍ മറുപടി നല്‍കിയത്.
നടിയെ ആക്രമിച്ച കേസില്‍ ദിലീപിനെതിരെയുള്ളത് കെട്ടിച്ചമച്ച കഥയാണെന്നും ശ്രീനിവാസന്‍ അഭിമുഖത്തില്‍ ആരോപിച്ചു. ഒന്നരക്കോടി രൂപക്ക് പള്‍സര്‍ സുനിക്ക് ദിലീപ് ക്വട്ടേഷന്‍ നല്‍കിയെന്നത് വിശ്വസനീയമല്ല. താനറിയുന്ന ദിലീപ് ഇത്തരം കാര്യങ്ങള്‍ക്ക് ഒന്നരപ്പൈസ പോലും ചെലവാക്കില്ലെന്നും ശ്രീനിവാസന്‍ പറഞ്ഞു.