അവതാരകയും നടിയുമായ എലീന പടിക്കലിന്റെ വിവാഹ ചിത്രങ്ങളും വീഡിയോകളും സോഷ്യല്‍ മീഡിയയില്‍ വൈറലാണ്. ബിഗ് ബോസ് മത്സരാര്‍ത്ഥിയായി ശ്രദ്ധ നേടിയ താരത്തിന്റെ വിവാഹത്തില്‍ ബിഗ് ബോസിലെ സുഹൃത്തുക്കളും എത്തിയിരുന്നു. എന്നാല്‍ ഷോയില്‍ എലീനയുടെ അടുത്ത സുഹൃത്തുക്കളായ ആര്യ, വീണ, ഫുക്രു എന്നിവരുടെ അസാന്നിദ്ധ്യം ആരാധകര്‍ ശ്രദ്ധിച്ചു കഴിഞ്ഞു.
ആര്യയുടെ ഇന്‍സ്റ്റഗ്രാം പേജില്‍ ക്വസ്റ്റ്യന്‍ ആന്‍സര്‍ സെക്ഷനില്‍ ഇതേ കുറിച്ചാണ് ചിലര്‍ സംശയം ചോദിച്ചിരിക്കുന്നത്. എലീനയുടെ വിവാഹത്തിന് ബിഗ് ബോസിലെ മറ്റ് താരങ്ങളൊക്കെ ഉണ്ട്. ഫുക്രു, വീണ, ആര്യ എന്നിവരെ മാത്രം കാണുന്നില്ലല്ലോ. മുമ്പ് ഏറ്റവും കൂടുതല്‍ സൗഹൃദം ഉണ്ടായിരുന്ന നിങ്ങളെന്താണ് വിവാഹത്തിന് പോവാത്തത് എന്നായിരുന്നു ഒരാളുടെ ചോദ്യം.
സമയം പോവുന്നതിന് അനുസരിച്ച് ആളുകളും അവര്‍ക്ക് പ്രാധാന്യമുള്ളവരും മാറി കൊണ്ടിരിക്കും. പിന്നെ വിളിക്കാത്ത കല്യാണത്തിന് പോയി എനിക്ക് തീരെ ശീലമില്ല എന്നാണ് ആര്യ മറുപടി നല്‍കുന്നത്. അതേസമയം, ഏഴു വര്‍ഷത്തെ നീണ്ട പ്രണയത്തിന് ശേഷമാണ് എലീനയും ബിസിനസുകാരനായ രോഹിതും വിവാഹിതരായത്.
സുഹൃത്തിന്റെ സുഹൃത്തായ രോഹിത്തിനെ ബംഗളൂരുവില്‍ വെച്ച് യാദൃച്ഛികമായാണ് എലീന പരിചയപ്പെടുന്നത്. പിന്നീട് ഇരുവരും പ്രണയത്തിലാവുകയായിരുന്നു. വ്യത്യസ്ത മതത്തില്‍ ഉള്ളവരായതിനാല്‍ ഇരുകുടുംബങ്ങളും എതിര്‍ത്തു. എങ്കിലും സമ്മതിക്കുന്നതു വരെ കാത്തിരിക്കാനായിരുന്നു ഇവരുടെ തീരുമാനം. ഒടുവില്‍ വീട്ടുകാരുടെ സമ്മതത്തോടെ പ്രണയസാഫല്യം.