മമ്മൂട്ടി പകര്‍ത്തിയ ബുള്‍ ബുള്‍ പക്ഷിയുടെ ചിത്രം അടുത്തിടെ മൂന്ന് ലക്ഷം രൂപയ്ക്ക് ലേലത്തില്‍ വിറ്റു പോയിരുന്നു. താരത്തിന്റെ ഫോട്ടോഗ്രാഫിയെ കുറിച്ച് സഹതാരങ്ങളും തുറന്നു പറായാറുണ്ട്. മഞ്ജു വാര്യര്‍, കുഞ്ചാക്കോ ബോബന്‍ അടക്കമുള്ളവര്‍ താരത്തിന്റെ ക്ലിക്ക് സോഷ്യല്‍ മീഡിയയില്‍ പങ്കുവച്ചിട്ടുണ്ട്.
എന്നാല്‍ മമ്മൂട്ടി നന്നായി ഫോട്ടോ എടുക്കും എന്ന് അറിഞ്ഞപ്പോള്‍ താന്‍ അദ്ദേഹത്തോട് ദേഷ്യപ്പെടുകയാണ് ചെയ്തതെന്ന് പറയുകയാണ് നടി മീന ഇപ്പോള്‍. അതിന്റെ കാരണവും മീന വ്യക്തമാക്കുന്നുണ്ട്. ”അദ്ദേഹം നന്നായി ഫോട്ടോ എടുക്കും. ഏതോ ഒരു ആര്‍ട്ടിസ്റ്റിന്റെ ഫോട്ടോ എടുത്ത് അവര്‍ അത് സോഷ്യല്‍ മീഡിയയില്‍ ഇട്ടു.”
”നിങ്ങളുടെ കൂടെ ഇത്രയും സിനിമ ചെയ്തു എന്നിട്ടും എന്തുകൊണ്ടാണ് എന്റെ ഫോട്ടോ എടുക്കാത്തതെന്ന് ഞാന്‍ വഴക്കിട്ടു. അടുത്ത തവണ തീര്‍ച്ചയായും എടുക്കാമെന്ന് മമ്മൂക്ക പറഞ്ഞു” എന്നാണ് മീന ഒരു അഭിമുഖത്തില്‍ പറഞ്ഞിരിക്കുന്നത്. അതേസമയം, മമ്മൂട്ടിക്കൊപ്പം ബാലതാരമായും നടന്റെ നായികയായും മീന അഭിനയിച്ചിട്ടുണ്ട്.
ഒരു കൊച്ചുകഥ ആരും പറയാത്ത കഥ എന്ന സിനിമയിലാണ് മമ്മൂട്ടിക്കൊപ്പം മീന ബാലതാരമായി വേഷമിട്ടത്. രാക്ഷസരാജാവ് എന്ന ചിത്രത്തിലാണ് മീന ആദ്യമായി മമ്മൂട്ടിയുടെ നായികയായി വേഷമിട്ടത്. റൗഡി ബേബി എന്ന തമിഴ് ചിത്രമാണ് മീനയുടെതായി ഇനി റിലീസിന് ഒരുങ്ങുന്നത്.