നമ്മള്‍ എന്ന ചിത്രത്തിലൂടെ മലയാള സിനിമയിലേക്ക് എത്തിയ താരമാണ് രേണുക മേനോന്‍. മീരയുടെ ദു:ഖവും മുത്തുവിന്റെ സ്വപ്നവും, വര്‍ഗം, പതാക തുടങ്ങിയ ചിത്രങ്ങളില്‍ അഭിനയിച്ച താരം അന്യഭാഷ ചിത്രങ്ങളിലും തിളങ്ങിയിരുന്നു. എന്നാല്‍ 2006ന് ശേഷം സിനിമയില്‍ നിന്നും വിട്ടുനില്‍ക്കുകയാണ് താരം.
മലയാള സിനിമയിലേക്ക് തിരിച്ചു വരുമോ എന്ന ചോദ്യത്തിന് മറുപടി നല്‍കിയിരിക്കുകയാണ് രേണുക. അവിടെ അത്രമാത്രം ആളുകളെ കിട്ടാന്‍ ബുദ്ധിമുട്ടുണ്ടോ എന്നാണ് ചിരിച്ചു കൊണ്ടുള്ള രേണുകയുടെ ചോദ്യം. സിനിമയെ വളരെയധികം സ്നേഹിക്കുന്ന അത് തന്നെ കരിയറാക്കണമെന്ന് ആഗ്രഹിച്ചു നില്‍ക്കുന്ന നിരവധി പേര്‍ മലയാളത്തിലുണ്ട്.
അതുകൊണ്ട് തന്നെ ഏത് കഥാപാത്രമായാലും അവരെ പോലുള്ളവര്‍ ചെയ്യുന്നതാവും നല്ലത് എന്നാണ് രേണുകയുടെ മറുപടി. അതേസമയം, നമ്മള്‍ സിനിമയുടെ ലൊക്കേഷനില്‍ നടന്ന രസകരമായ വിശേഷങ്ങളും രേണുക പങ്കുവെച്ചു. ഷൂട്ടിംഗ് സമയത്ത് സിദ്ധാര്‍ത്ഥുമായി സ്ഥിരം അടിയായിരുന്നു.
എന്തെങ്കിലും പറഞ്ഞ് തന്നെ ദേഷ്യം പിടിപ്പിക്കുക സിദ്ധാര്‍ത്ഥിന്റെ രീതി ആയിരുന്നു. സംസാരിക്കുമ്പോള്‍ എപ്പോഴും കളിയാക്കി കൊണ്ട് എന്തെങ്കിലുമൊരു കോമഡി പറയും. നമ്മളെ ചൊറിഞ്ഞു കൊണ്ടിരിക്കുക എന്ന് പറയില്ലേ. തന്റെ സഹോദരനും അങ്ങനെയാണ്. അതുകൊണ്ട് തനിക്ക് അത് പരിചയമാണ്.
സിദ്ധു പറയുന്നതിലെല്ലാം കോമഡി ഉണ്ടാവും. പക്ഷേ കളിയാക്കുമ്പോള്‍ ദേഷ്യം വരും. നടന്‍ ജിഷ്ണുവിന്റെ മരണ വാര്‍ത്ത ഭയങ്കര ഷോക്കായിരുന്നു. പക്വതയോടെ കാര്യങ്ങളെ സമീപിച്ചിരുന്നു ആളായിരുന്നു ജിഷ്ണു. ഇപ്പോഴും രാഘവന്‍ അങ്കിളിനെ പറ്റി ആലോചിക്കുമ്പോള്‍ സങ്കടമാണ് എന്നാണ് രേണുക പറയുന്നത്.