ഇന്ത്യൻ സിനിമയിലെ മുൻനിര നടിമാരിൽ ഒരാളാണ് മലയാളിയായ പാലക്കാട്ടുകാരി വിദ്യ ബാലൻ. മലയാളികൾക്കെന്നും പ്രിയപ്പെട്ട താരം. മലയാളിയെന്ന് പറയുമ്പോൾപറയുമ്പോൾ തനിക്കിന്നും അഭിമാനമാണെന്നാണ് നടി പറയാറുള്ളത്. ഇപ്പോഴിതാ വിദ്യ ബാലൻ്റെ ചില അഭിമുഖങ്ങൾ സോഷ്യൽ മീഡിയയിലൂടെ വൈറലാവുകയാണ്.
പതിനേഴ് വർഷത്തിന് മുൻപ് വിദ്യ ബാലനും അക്ഷയ് കുമാറും നായികാ നായകന്മാരായി അഭിനയിച്ച ഭൂൽ ഭുലയ്യയുടെ മൂന്നാം ഭാഗം റിലീസിനൊരുങ്ങുകയാണ്. ഇതിനോട് അനുബന്ധിച്ച് രേഖ മേനോന് നൽകിയ അഭിമുഖത്തിലൂടെ തൻ്റെ സിനിമാ ജീവിതത്തെ പറ്റിയും അഭിനയത്തിലേക്ക് എത്തിയതിനെ കുറിച്ചും നടി വെളിപ്പെടുത്തുന്നത്. ഭൂൽ ഭുലയ്യ റിലീസ് ചെയ്‌തിട്ട് പതിനേഴ് വർഷമായെന്ന് ഇപ്പോഴും തനിക്ക് വിശ്വസിക്കാൻ സാധിക്കുന്നില്ലെന്നാണ് വിദ്യ പറയുന്നത്.
ആ സിനിമയ്ക്ക് ശേഷം ആളുകളെ പേടിപ്പിക്കുന്നത് എനിക്ക് എന്നും ഒരു ഹരമായിരുന്നു. വീട്ടിൽ അച്ഛനെയും അമ്മയെയും പേടിപ്പിക്കാറില്ലെങ്കിലും സഹോദരിയായിരുന്നു കൂടുതലും പേടിപ്പിച്ചിരുന്നത്. ഭൂൽ ഭുലയ്യ സ്ക്രീനിങ്ങിന് ശേഷം വീട്ടിൽ വന്ന ഞാനും അനിയത്തിയും ഒരുമിച്ച് ഒരു ബെഡിലാണ് കിടന്നുറങ്ങിയത്. ഇടയ്ക്ക് ഞാൻ എന്തോ പറയാൻ വേണ്ടി എഴുന്നേറ്റ് വിളിച്ചതോടെ അവൾ പേടിച്ചു. എന്നിട്ട് ഇനി ലൈറ്റ് ഇട്ട് തുടങ്ങിയാൽ മതി എന്ന് പറഞ്ഞു. അവൾ ആ സമയത്ത് എന്നെ കണ്ട് പേടിച്ച് പോയിരുന്നു എന്നും വിദ്യ ബാലൻ പറയുന്നു.
അതേസമയം സിനിമയിലേക്ക് അഭിനേതാവായി വരാൻ കാരണം നടി മാധുരി ദീക്ഷിത് ആണെന്നും വിദ്യ പറഞ്ഞു. മാധുരിയുടെ ഹിറ്റ് സോംഗ് ആയ ‘ഏക് ദോ തീൻ’ കണ്ടതിനു ശേഷം പെട്ടെന്നാണ് തനിക്ക് ഒരു ആക്ടർ ആവണമെന്ന് തീരുമാനമെടുക്കുന്നത്. പിന്നീട് നടിയായ ശേഷം ഞാൻ മാധുരി ദീക്ഷിതനെ ആദ്യമായി കണ്ടപ്പോൾ നിങ്ങൾ കാരണമാണ് ഞാൻ ഇന്നൊരു നടിയായതെന്ന് അവരോട് നേരിട്ട് പറഞ്ഞിരുന്നുവെന്നും വിദ്യ പറയുന്നു.