യാതൊരു സിനിമാപാരമ്പര്യവും ഇല്ലാതെയാണ് അഞ്ചു വര്‍ഷം മുന്നേയുള്ള നടി ഐശ്വര്യ ലക്ഷ്മിയുടെ സിനിമാ പ്രവേശം. ചുരുങ്ങിയ വേഷങ്ങള്‍ കൊണ്ട് തന്നെ പ്രതിഭ തെളിയിച്ച നടിയുടെ സിനിമായാത്ര ധനുഷിനൊപ്പമുളള ജഗമേ തന്തിരത്തില്‍ എത്തി നില്‍ക്കുകയാണ്.
ഇപ്പോഴിതാ സിനിമാപ്രവേശത്തിന്റെ ആദ്യകാലത്ത് തനിക്ക് കുടുംബത്തില്‍ നിന്ന് ഇക്കാര്യത്തില്‍ എതിര്‍പ്പ് നേരിടേണ്ടി വന്നുവെന്ന് തുറന്നു പറഞ്ഞിരിക്കുകയാണ് ഇപ്പോള്‍ നടി.
ഞാന്‍ സിനിമയില്‍ വരുന്നതിനോട് രക്ഷിതാക്കള്‍ക്ക് നല്ല എതിര്‍പ്പായിരുന്നു. സിനിമയുമായി ബന്ധമൊന്നുമില്ലാതിരുന്ന ഞാന്‍ നടിയായതും ഇവര്‍ക്ക് ഷോക്കായി. ഇപ്പോഴും അവര്‍ അതിനോട് പൊരുത്തപ്പെട്ട് പോകുന്നുവെന്ന് മാത്രം. ഗൃഹലക്ഷ്മിയുമായുള്ള അഭിമുഖത്തില്‍ ഐശ്വര്യ പറഞ്ഞു.
മായാനദി കണ്ടിട്ട് അച്ഛനും അമ്മയും കുറച്ച് വഴക്ക് പറഞ്ഞിരുന്നു. സിനിമ അവര്‍ക്കിഷ്ടമായെങ്കിലും അതിലെ ചില സീനുകളോടായിരുന്നു വിരോധം. രക്ഷിതാക്കളല്ലേ അത് സ്വാഭാവികമാണ്. അത് സിനിമയുടെ ഭാഗമാണെന്ന് മനസ്സിലാക്കാന്‍ തന്നെ അവര്‍ കുറച്ച് സമയമെടുത്തു. ഐശ്വര്യ പറയുന്നു.