ഉദയകൃഷ്ണയ്‌ക്കെതിരെ വരുന്ന വിമര്‍ശനങ്ങളില്‍ പ്രതികരണവുമായി സംവിധായകന്‍ അജയ് വാസുദേവ്. സിനിമ ഒരു ടീം വര്‍ക്ക് ആണ്. താരങ്ങള്‍ തങ്ങളുടെ അഭിപ്രായങ്ങള്‍ കൂടി പറഞ്ഞതിന് ശേഷമാണ് തിരക്കഥ അന്തിമമാക്കുക. വ്യക്തിപരമായി ആക്രമിക്കുന്നത് വേദനയുണ്ടാക്കുമെന്നും ഇന്‍ഡസ്ട്രി ഹിറ്റുകളുടെ മീറ്റര്‍ അറിയുന്ന ഉദയകൃഷ്ണ തിരിച്ചുവരുമെന്നും അജയ് വാസുദേവ് പറഞ്ഞു.
‘ഉദയകൃഷ്ണ ഒരു സ്റ്റോറി റെഡിയാക്കി കഴിഞ്ഞാല്‍, അത് ആര്‍ട്ടിസ്റ്റുകളുമായി സംസാരിച്ച് അവരുടെ നിര്‍ദേശങ്ങള്‍ കേള്‍ക്കുകയാണ് ചെയ്യുന്നത്. എന്നാല്‍ ചില സിനിമകളില്‍ അവര്‍ എടുക്കുന്ന തീരുമാനങ്ങള്‍ തെറ്റിപ്പോകാം, ചിലത് വലിയ വിജയമാകും. തുടര്‍ച്ചയായി ഹിറ്റ് കൊടുക്കാന്‍ പറ്റില്ലല്ലോ.
വ്യക്തിപരമായ പരാമര്‍ശങ്ങള്‍ റിവ്യൂകളിലും മറ്റും വരുമ്പോള്‍, ചില വീഡിയോകള്‍ നമ്മള്‍ അയച്ച് കൊടുത്താല്‍ ഇതെനിക്ക് കിട്ടി എന്നാണ് അദ്ദേഹം പറയാറുള്ളത്. എനിക്ക് തോന്നിയിട്ടുള്ളത് വ്യക്തിയെ ആക്രമിക്കുമ്പോള്‍ ഉറപ്പായും വിഷമം കാണും എന്നാണ്, നമ്മളോട് തുറന്ന് പറഞ്ഞില്ലെങ്കില്‍ കൂടി.
എത്രയോ വര്‍ഷമായി ഇന്‍ഡസ്ട്രിയില്‍ നില്‍ക്കുന്നയാളാണ് ഉദയകൃഷ്ണ. ഇനിയും വലിയ വലിയ സിനിമകള്‍ ആണ് അദ്ദേഹം ചെയ്യാന്‍ പോകുന്നത്. ’20-20’ കഴിഞ്ഞ് ‘പട്ടണത്തില്‍ ഭൂതം’ ആണ് ചെയ്തത്. അത് പരാജയപ്പെട്ടു. അതുകഴിഞ്ഞ് വീണ്ടും ഒരു സിനിമയിലുടെ അദ്ദേഹം വരും. ആളുകള്‍ക്ക് കാണുമ്പോള്‍ എന്തൊക്കെയാണ് വേണ്ടത് എന്ന മീറ്റര്‍ കൃത്യമായി അദ്ദേഹത്തിനറിയാം. ചില സമയം അത് വിചാരിക്കുന്ന രീതിയില്‍ വര്‍ക്ക് ആകുന്നില്ല,’ പോപ്പര്‍ സ്റ്റോപ്പ് മലയാളം എന്ന യൂട്യൂബ് ചാനലിന് നല്‍കിയ അഭിമുഖത്തില്‍ അജയ് വാസുദേവ് വ്യക്തമാക്കി.
