സംവിധായകന്‍ കമലിനോട് തനിക്ക് പൊട്ടിത്തെറിക്കേണ്ടി വന്നിട്ടുണ്ടെന്ന് തുറന്നുപറഞ്ഞ് നടന്‍ അലന്‍സിയര്‍. സിനിമയിലേക്കെന്ന് പറഞ്ഞ് വിളിച്ച് തന്നെ കാത്തു നില്‍പ്പിച്ചെന്നും പക്ഷേ താന്‍ കാത്ത് നില്‍ക്കുന്ന അക്കാര്യം കമല്‍ അറിഞ്ഞിരുന്നില്ലെന്നും അലന്‍സിയര്‍ പറയുന്നു.
അലന്‍സിയറിന്റെ വാക്കുകള്‍
കമലിന്റെ അടുത്ത് ഞാന്‍ ചാന്‍സ് ചോദിച്ച് ചെന്നതല്ല. ആ സിനിമയിലെ അസോസിയേറ്റാണ് എന്നെ വിളിച്ചത്. സന്തോഷ് എച്ചിക്കാനമാണ് എന്നെ വിളിച്ച് പറയുന്നത് കമല്‍ സാര്‍ ഒരു സിനിമ ചെയ്യുന്നുണ്ട്. നിങ്ങളെ അസോസിയേറ്റ് വിളിക്കും നമ്പര്‍ കൊടുക്കട്ടേ എന്ന്. ഞാന്‍ സ്റ്റീവ് ലോപ്പസ് കഴിഞ്ഞ് നില്‍ക്കുന്ന സമയം ആയിരുന്നു’
‘അങ്ങനെയാണ് അസോസിയേറ്റ് എന്നെ വിളിക്കുന്നതും ചെല്ലാന്‍ പറഞ്ഞ ദിവസം അവിടെ ചെല്ലുന്നതും. അദ്ദേഹത്തെ കാണാന്‍ പറ്റുന്നില്ല, പക്ഷെ പുള്ളി അത് അറിഞ്ഞിട്ടില്ല എന്ന് പിന്നീടാണ് അറിയുന്നത്. ഇതേക്കുറിച്ച് ഞാനും അന്വേഷിക്കണമായിരുന്നു’
‘പക്ഷെ സമയം കഴിഞ്ഞപ്പോള്‍ ഞാനാ മുറിയിലേക്ക് തള്ളിക്കയറി ചെല്ലുകയായിരുന്നു. കസേര നീക്കിയിട്ടു. എന്തായെന്ന് പുള്ളി എന്നോട് ചോദിച്ചു. ഞാന്‍ പറഞ്ഞു, എന്റെ പേര് അലന്‍സിയര്‍. നിങ്ങളുടെ ഒരു അസോസിയേറ്റ് എന്നെ സിനിമയില്‍ അഭിനയിക്കാന്‍ വിളിച്ചു. അങ്ങനെ വന്നതാണ്. രാവിലെ ആറ് മണി മുതല്‍ നിങ്ങളെ കാത്ത് ഫ്‌ലാറ്റിന് മുന്നില്‍ കാറില്‍ കിടക്കുകയാണ്’
രണ്ട് വാക്ക് പറഞ്ഞ് പോവാന്‍ വേണ്ടി വന്നതാണ്’ എന്നെങ്കിലും ഒരു സിനിമാ നടന്‍ ആയാല്‍ നിങ്ങളെന്നെ വിളിച്ചാല്‍ ഞാന്‍ അഭിനയിക്കില്ല എന്ന് പറഞ്ഞ് ഞാന്‍ പോയി. പിന്നെ എന്നെ വിളിച്ചിട്ടില്ല. വിളിച്ചാല്‍ ഞാന്‍ അഭിനയിക്കും. അന്നെന്റെ വാശിക്ക് പറഞ്ഞതാണ്,’