‘ഉണ്ണീ വാവാവോ’ എന്ന താരാട്ട് പാട്ട് പഠിച്ചതിനെ കുറിച്ച് ആലിയ ഭട്ട് സംസാരിക്കുന്ന വീഡിയോയാണ് ഇപ്പോള്‍ സോഷ്യല്‍ മീഡിയയിൽ വൈറൽ. ഗ്രേറ്റ് ഇന്ത്യന്‍ കപില്‍ ഷോയില്‍ പങ്കെടുത്തപ്പോഴാണ് ആലിയ ഇക്കാര്യം പറഞ്ഞത്. ‘ഉണ്ണീ വാവാവോ’ എന്ന പാട്ട് പാടിക്കൊണ്ടാണ് ആലിയ സംസാരിച്ചത്.

ഈ താരാട്ട് പാട്ട് രണ്‍ബിറും പാടാറുണ്ട് എന്നും റാഹയെ പരിചരിക്കുന്ന സ്ത്രീ വന്നപ്പോള്‍ മുതല്‍ ഈ താരാട്ടുപാട്ട് പാടിക്കൊടുക്കുന്നുണ്ട് എന്നും ആലിയ പറഞ്ഞു. റാഹയ്ക്ക് ഉറങ്ങാന്‍ സമയമാകുമ്പോള്‍ മാമാ വാവോ, പാപാ വാവോ എന്നുപറഞ്ഞ് ഉറങ്ങണമെന്ന് ആവശ്യപ്പെടാറുണ്ട് എന്നും താരം പറഞ്ഞു. അങ്ങനെയാണ് രണ്‍ബിര്‍ ഈ താരാട്ടുപാട്ട് പഠിച്ചത് എന്നും ആലിയ പറഞ്ഞു.

ആലിയയുടെ ഈ വീഡിയോ വൈറലായതോടെ നടി അമല പോൾ ഭർത്താവ് ജഗത് ദേശായിയെ മെൻഷൻ ചെയ്ത് പങ്കുവച്ച ഇൻസ്റ്റാഗ്രാം സ്റ്റോറി ആണ് ഇപ്പോൾ ശ്രദ്ധ നേടുന്നത്. ‘നിങ്ങൾ ഇപ്പോൾ പഠിക്കുന്നതാണ് നല്ലത്’ എന്നാണ് നടി സ്റ്റോറിൽ കുറിച്ചിരിക്കുന്നത്.

കഴിഞ്ഞ വർഷം നവംബറിലായിരുന്നു അമല പോളും ജഗത് ദേശായിയും വിവാഹിതരായത്. ജൂണിൽ ദമ്പതികൾ തങ്ങളുടെ കുഞ്ഞിനെ സ്വീകരിച്ചു. ഗുജറാത്ത് സ്വദേശിയായ ജഗത്, ടൂറിസം, ഹോസ്പിറ്റാലിറ്റി മേഖലകളിൽ ജോലി ചെയ്യുന്നു, നിലവിൽ നോർത്ത് ഗോവയിലെ ആഡംബര ഹോംസ്റ്റേയുടെ സെയിൽസ് മേധാവിയാണ്. യാത്രയ്ക്കിടെ കണ്ടുമുട്ടിയ അമലയും ജഗത്തും അടുത്ത സുഹൃത്തുക്കളായി, ഒടുവിൽ പ്രണയത്തിലായി.