മലയാളത്തെ എക്കാലത്തെയും മികച്ച ഹിറ്റ് ജോഡികളിലൊന്നായ മോഹന്‍ലാല്‍-ശ്രീനിവാസന്‍ കൂട്ടുകെട്ടില്‍ ഒരു ചിത്രം സംഭവിക്കാന്‍ പോകുന്നു. ശ്രീനിവാസന്‍ തന്നെയാണ് ഇതിനെ കുറിച്ചുള്ള സൂചനകള്‍ പങ്കുവെച്ചത്. വിനീസ് ശ്രീനിവാസന്റെ സംവിധാനത്തില്‍ പ്രണവ് മോഹന്‍ ലാലും ധ്യാന്‍ ശ്രീനിവാസനും കേന്ദ്രകഥാപാത്രങ്ങളായി എത്തിയ വര്‍ഷങ്ങള്‍ക്കു ശേഷം എന്ന ചിത്രം കാണാനെത്തിയ വേളയില്‍ മാധ്യമപ്രവര്‍ത്തകരോട് സംസാരിക്കവേയാണ് ശ്രീനാവാസന്‍ ഇക്കാര്യത്തെ കുറിച്ച് സംസാരിച്ചത്.
അസുഖം മാറികഴിഞ്ഞാല്‍ പണ്ട് കണ്ടിരുന്ന പോലെ മോഹന്‍ലാലും ശ്രീനിവാസനും ഒരുമിക്കുന്ന ഒരു സിനിമ ഉണ്ടാകുമോ എന്ന ചോദ്യത്തോട് അതിന് സാധ്യതയുണ്ടെന്നാണ് ശ്രീനിവാസന്‍ പ്രതികരിച്ചത്. അങ്ങനെ ഒരു ഡിസ്‌കഷന്‍ നടന്നിട്ടുണ്ട്. ആരോഗ്യപരമായി ശരിയല്ലാത്തതാണ് ഇത് നടക്കാത്തതിന് ഒരു കാര്യം. ചില കാര്യങ്ങള്‍ ഒക്കെ നടക്കുമെന്ന് വിചാരിക്കുന്നു.
സ്വാമീസ് ലോഡ്ജില്‍ വെച്ചാണ് മോഹന്‍ലാലിനെ ആദ്യമായി കാണുന്നത്. സുരേഷ് കുമാറിന്റെ കൂടെ മഞ്ഞില്‍ വിരിഞ്ഞ പൂക്കള്‍ കഴിഞ്ഞ സമയത്ത് ഈ ലോഡ്ജില്‍ നില്‍ക്കുന്ന സമയത്താണ് ആദ്യമായി കണ്ടത്.
ഞാന്‍ അവിടെ സ്ഥിരമായി താമസിക്കാറില്ല. ഇടക്ക് പോയപ്പോഴാണ് മോഹന്‍ലാലിനെ കാണുന്നത്. അന്ന് അങ്ങനെ സിനിമയുമായി ബന്ധപ്പെട്ട കാര്യങ്ങള്‍ ഒന്നും സംസാരിക്കാറുണ്ടായിരുന്നില്ലെന്നും ശ്രീനിവാസന്‍ പറഞ്ഞു.