ബിഗ് ബോസ് സീസണ്‍ 3യില്‍ മത്സരാര്‍ത്ഥിയാകുന്നില്ലെന്ന് വ്യക്തമാക്കി മിനിസ്‌ക്രീന്‍ താരം അനുമോള്‍. സീസണ്‍ 3 പ്രഖ്യാപിച്ചതു മുതല്‍ മത്സരാര്‍ത്ഥികളുടെ പേരുകളാണ് സോഷ്യല്‍ മീഡിയയില്‍ ഉയരുന്നത്. റിമി ടോമി, ബോബി ചെമ്മണ്ണൂര്‍, അനു കെ. അനിയന്‍ തുടങ്ങിയ താരങ്ങളെല്ലാം ഷോയില്‍ പങ്കെടുക്കുന്നില്ലെന്നും വ്യാജ വാര്‍ത്തകളാണ് ഉയരുന്നതെന്നും അറിയിച്ച് രംഗത്തെത്തിയിരുന്നു.
ടൈംസ് ഓഫ് ഇന്ത്യക്ക് നല്‍കിയ അഭിമുഖത്തിലാണ് ബിഗ് ബോസില്‍ താന്‍ മത്സരാര്‍ത്ഥിയാകുന്നില്ലെന്ന് അനുമോള്‍ പറഞ്ഞത്. ഒരുപാടു പേര്‍ തന്നോട് ചോദിക്കുന്നുണ്ട്. എല്ലാ ദിവസവും മെസേജുകള്‍ വരുന്നുണ്ട്. ഒരുകൂട്ടം ആളുകള്‍ പോകരുതേ എന്ന് പറയുമ്പോള്‍ മറ്റു ചിലര്‍ പോകണം എന്ന് പറയുന്നു.
എന്തായാലും താന്‍ ബിഗ് ബോസില്‍ ഉണ്ട് എന്നത് വ്യാജ വാര്‍ത്തയാണ്. ബിഗ് ബോസിലേക്ക് പോകുന്നില്ല, അവര്‍ തന്നെ സമീപിച്ചിട്ടുമില്ല. എന്നാല്‍ ക്ഷണം കിട്ടിയാല്‍ പോകുമെന്നും അനുമോള്‍ പറയുന്നു. ക്ഷണം കിട്ടിയിരുന്നെങ്കില്‍ ഒരു കൈ നോക്കിയേനെ. ആ വീടിന്റെ വൈബ് ആസ്വദിച്ചേനെ.
എപ്പോഴും വഴക്കും ബഹളവും ഒക്കെ ആണെങ്കിലും, അപരിചിതരായ ഒരു കൂട്ടം ആളുകള്‍ ഒരു കുടുംബം പോലെ 100 ദിവസം ഒരു വീട്ടില്‍ കഴിയുക എന്നത് തനിക്ക് ഇഷ്ടപ്പെട്ട ഒരു പരിപാടിയാണ് എന്നും അനുമോള്‍ പറഞ്ഞു. സ്റ്റാര്‍ മാജിക് എന്ന പരിപാടിയിലൂടെയാണ് അനുമോള്‍ ശ്രദ്ധിക്കപ്പെട്ടത്. പാടാത്ത പൈങ്കിളി എന്ന സീരിയലിലാണ് അനുമോള്‍ ഇപ്പോള്‍ അഭിനയിക്കുന്നത്.