ധനുഷ് തിരക്കഥയെഴുതി സംവിധാനം ചെയ്യുന്ന ചിത്രമാണ് ‘റായന്‍’. ധനുഷിന്റെ അമ്പതാമത്തെ ചിത്രമായി പുറത്തിറങ്ങാനിരിക്കുന്ന ചിത്രം താരത്തിന്റെ സംവിധാനത്തില്‍ ഒരുങ്ങുന്ന മൂന്നാമത്തെ ചിത്രം കൂടിയാണ്. ചിത്രത്തില്‍ നായികയായി എത്തുന്നത് നടി അപര്‍ണ ബാലമുരളിയാണ്. ധനുഷ് തനിക്ക് നല്‍കിയ ആത്മവിശ്വാസത്തെ കുറിച്ച് സംസാരിച്ചിരിക്കുകയാണ് അപര്‍ണ ഇപ്പോള്‍.
”റായന്‍ സിനിമയില്‍ അഭിനയിക്കുമ്പോള്‍ ധനുഷ് സാര്‍ ഒരുപാട് ആത്മവിശ്വാസം നല്‍കിയിട്ടുണ്ട്. സാറ് മാത്രമല്ല, ആ ടീം മുഴുവനും. ഇടയ്ക്ക് ഞാന്‍ നല്ലോണം തടിവെച്ചിട്ട് എല്ലാവരും എന്നെ മാക്സിമം തളര്‍ത്താന്‍ നോക്കിയിരുന്നു. അതൊന്നും ശ്രദ്ധിക്കേണ്ടതില്ലെങ്കിലും നിരന്തരം എല്ലാവരും പറയുമ്പോള്‍ നമ്മളും ബോധപൂര്‍വം ഓരോന്നും ശ്രദ്ധിക്കും.”
”തുടര്‍ച്ചയായി ആളുകള്‍ വണ്ണത്തെ കുറിച്ച് സംസാരിക്കുമ്പോള്‍ ബുദ്ധിമുട്ട് തോന്നാം. ഇവരൊക്കെ ചിന്തിക്കാതെ സംസാരിക്കുന്നത് എന്താണെന്ന് തോന്നിപ്പോകും. ഇപ്പോള്‍ ഭാരം കുറഞ്ഞു. എന്നാലും ആ സമയത്ത് ‘റായന്‍’ ടീമിലെ ആരും ബോധപൂര്‍വമോ അല്ലാതെയോ എന്നോട് മോശമായി സംസാരിച്ചിട്ടേയില്ല.”
”സ്‌ക്രീനില്‍ ഏറ്റവും നന്നായിട്ട് പെര്‍ഫോം ചെയ്യുക എന്നേ അവര്‍ക്കുണ്ടായിരുന്നുള്ളൂ. വളരെയധികം ആത്മവിശ്വാസം കിട്ടിയ സിനിമയാണ് ‘റായന്‍’. അവരോടൊക്കെ നന്ദിയുണ്ട്. എത്ര ഉയരത്തിലെത്തിയാലും ഞാനെപ്പോഴും നന്ദിയുള്ളവളായിരിക്കും” എന്നാണ് അപര്‍ണ ബാലമുരളി സ്റ്റാര്‍ ആന്‍ഡ് സ്റ്റൈലിന് നല്‍കിയ അഭിമുഖത്തില്‍ പറയുന്നത്.
അതേസമയം, റായന്‍ ചിത്രത്തില്‍ ധനുഷിനും അപര്‍ണയ്ക്കുമൊപ്പം കാളിദാസ് ജയറാം, സന്ദീപ് കിഷന്‍, നിത്യാ മേനോന്‍, അനിഖ സുരേന്ദ്രന്‍, എസ് ജെ സൂര്യ, സെല്‍വരാഘവന്‍, വരലക്ഷ്മി ശരത്കുമാര്‍ എന്നിവരും പ്രധാന വേഷത്തിലെത്തും. സണ്‍ പിക്ചേഴ്സിന്റെ ബാനറില്‍ കലാനിധി മാരന്‍ ആണ് ചിത്രം നിര്‍മ്മിക്കുന്നത്.