എന്നും സിനിമാപ്രേമികളുടെ മനസില്‍ തങ്ങി നില്‍ക്കുന്ന എവര്‍ഗ്രീന്‍ ഹിറ്റ് ചിത്രമാണ് മണിരത്‌നത്തിന്റെ ‘റോജ’. സംഗീതസംവിധായകനായി എ.ആര്‍ റഹ്‌മാന്‍ അരങ്ങേറ്റം കുറിച്ച സിനിമ കൂടിയാണിത്. സിനിമയ്‌ക്കൊപ്പം തന്നെ ചിത്രത്തിലെ പാട്ടുകളും രാജ്യമെമ്പാടുമുള്ള ആസ്വാദകര്‍ ഏറ്റെടുത്തിരുന്നു. ആദ്യ ചിത്രം റോജയ്ക്ക് ശേഷം ‘യോദ്ധ’ എന്ന ചിത്രത്തിന് വേണ്ടിയാണ് എ.ആര്‍ റഹ്‌മാന്‍ ഗാനങ്ങള്‍ ഒരുക്കിയത്.
എന്നാല്‍ യോദ്ധയ്ക്ക് പിന്നാലെ ഏറെ വര്‍ഷങ്ങള്‍ക്ക് ശേഷമാണ് റഹ്‌മാന്‍ വീണ്ടും മലയാളത്തില്‍ എത്തിയത്. 30 വര്‍ഷത്തിനിപ്പുറം 2022ല്‍ ‘മലയന്‍കുഞ്ഞ്’ എന്ന ചിത്രത്തിന് വേണ്ടിയാണ് റഹ്‌മാന്‍ പിന്നീട് സംഗീതം ഒരുക്കിയത്. ഇത് കൂടാതെ ഇനി റിലീസിന് ഒരുങ്ങുന്ന ‘ആടുജീവിതം’ സിനിമയ്ക്കും റഹ്‌മാന്‍ ആണ് സംഗീതം പകര്‍ന്നിരിക്കുന്നത്.
യോദ്ധയിലെ ഗാനങ്ങള്‍ വന്‍ ഹിറ്റ് ആയിട്ടും തുടര്‍ന്ന് മലയാളത്തില്‍ എത്താതിരുന്നതിനെ കുറിച്ച് സംസാരിച്ചിരിക്കുകയാണ് എ.ആര്‍ റഹ്‌മാന്‍ ഇപ്പോള്‍. മലയാള സിനിമ തനിക്ക് വീട് പോലെയാണ് എപ്പോള്‍ വേണമെങ്കിലും തിരിച്ചു വരാമെന്ന് കരുതി, അതാണ് ഇടവേളയ്ക്ക് കാരണമായത് എന്നാണ് എ.ആര്‍ റഹ്‌മാന്‍ മനോരമ ന്യൂസിനോട് പറഞ്ഞിരിക്കുന്നത്.
യോദ്ധയ്ക്ക് ശേഷം ഒരേസമയം തന്നെ ഒരുപാട് പ്രോജക്ടുകള്‍ ഏറ്റെടുക്കേണ്ടി വന്നു. തമിഴ്, തെലുങ്ക്, ഹിന്ദി എന്നിങ്ങനെ എല്ലാ ഭാഷകളില്‍ നിന്നും ഇന്ത്യയ്ക്ക് പുറത്തു നിന്നും വലിയ പ്രോജക്ടുകള്‍ വന്നു. എപ്പോള്‍ വേണമെങ്കിലും മലയാളത്തിലേക്ക് തിരിച്ചു വരാമായിരുന്നു. ഇവിടെയാണല്ലോ തുടങ്ങിയത്. അച്ഛന്‍, ആര്‍.കെ ശേഖര്‍ തുടങ്ങിയതും മലയാളത്തിലാണ്.
മലയാള സിനിമ ശരിക്കും വീട് പോലെ തന്നെയാണ്. ചിലപ്പോഴെല്ലാം നമ്മള്‍ നാടുചുറ്റി തിരികെ വീട്ടിലെത്താറില്ലേ, അതുപോലെ. കരിയറിലെ ആദ്യത്തെ ആറ് വര്‍ഷം താന്‍ മലയാളത്തിലെ സംഗീതസംവിധായകര്‍ക്ക് വേണ്ടി ഇന്‍സ്ട്രുമെന്റ്‌സ് വായിച്ചിരുന്നു. അതാണ് എന്റെ അടിത്തറ. അതുകൊണ്ടുതന്നെ എപ്പോള്‍ വേണമെങ്കിലും എനിക്ക് തിരിച്ചുവരാം എന്ന് ചിന്തിച്ചിരുന്നു. അതാണ് ഇടവേളയ്ക്ക് കാരണമായത് എന്നാണ് എ.ആര്‍ റഹ്‌മാന്‍ പറയുന്നത്.
