തമിഴിന് പുറമേ മലയാള സിനിമയിലും കഴിവ് തെളിയിച്ചിട്ടുള്ള നടനാണ് ആര്യ. നിരവധി ആരാധകരാണ് നടനുള്ളത്. ഇപ്പോഴിതാ, തന്റെ ഏറ്റവും പുതിയ ചിത്രം ക്യാപ്റ്റന്റെ പ്രമോഷന്റെ ഭാഗമായി കേരളത്തിലെത്തിയപ്പോൾ ആര്യ സംസാരിച്ചു ചില കാര്യങ്ങളാണ് ശ്രദ്ധേയമാകുന്നത്. മമ്മൂട്ടിയുടെ കൂടെ ഗ്രേറ്റ് ഫാദര്‍ എന്ന സിനിമയില്‍ അഭിനയിച്ചല്ലോ, ഇനി മോഹന്‍ലാലിന്റെ കൂടെ എന്നാണ് ഒരു മലയാളം സിനിമ ചെയ്യുക, എന്ന ചോദ്യത്തിന് മറുപടി പറയുകയായിരുന്നു അദ്ദേഹം.
മോഹൻലാലിനൊപ്പം അഭിനയിക്കണമെന്നാണ് തന്റെ ആഗ്രഹം. ഒരിക്കൽ മോഹൻലാലിനൊപ്പം അഭിനയിക്കാൻ തനിക്ക് അവസരം കിട്ടിയിട്ടും അത് നടന്നില്ലെന്നും അദ്ദേഹം പറഞ്ഞു. മോഹൻലാലിനെ നായകനാക്കി സിദ്ദിഖ് സംവിധാനം ചെയ്ത കാസനോവ എന്ന ചിത്രത്തിലാണ് അഭിനയിക്കാൻ തനിക്ക് അവസരം ലഭിച്ചിരുന്നത്. എന്നാൽ പിന്നീട് ഡേറ്റ് ക്ലാഷ് പോലുള്ള പ്രശ്നങ്ങൾ കാരണം ആ ചാൻസ് നഷ്ടപ്പെടുകയായിരുന്നെന്നും ആര്യ പറയുന്നു.
‘തീർച്ചയായും ലാലേട്ടനൊപ്പം ഒരു മലയാള സിനിമയിൽ അഭിനയിക്കണം. ലാലേട്ടന്റെ കൂടെ അഭിനയിക്കാൻ ഒരു ചാൻസ് കിട്ടിയിരുന്നു. കാസനോവ എന്ന ചിത്രമായിരുന്നു അത്. പക്ഷെ ആ പടത്തിന്റ ഷൂട്ട് നീണ്ടു പോയപ്പോൾ തനിക്ക് ഡേറ്റ് പ്രശ്നമാകുകയായിരുന്നു. അതുകൊണ്ട് ആ പടത്തിൽ ജോയിൻ ചെയ്യാൻ പറ്റിയില്ല. അങ്ങനെ ആ ചാൻസ് പോയി. ലാലേട്ടനോടൊപ്പം ഉടൻ തന്നെ ഒരു മലയാള സിനിമ ചെയ്യാൻ പറ്റും എന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. നേരത്തെ മോഹൻലാലിനൊപ്പം കാപ്പൻ എന്ന തമിഴ് ചിത്രത്തിൽ ആര്യ അഭിനയിച്ചിട്ടുണ്ട്.
മമ്മൂട്ടിയുടെ ഗ്രേറ്റ് ഫാദർ, പൃഥ്വിരാജ് നായകനായ ഉറുമി, ലിജോ ജോസ് പെല്ലിശ്ശേരിയുടെ ഡബിൾ ബാരൽ എന്നീ മലയാള ചിത്രങ്ങളിലും ആര്യ അഭിനയിച്ചിട്ടുണ്ട്. ക്യാപ്റ്റൻ എന്ന തമിഴ് ചിത്രമാണ് താരത്തിന്റേതായി റിലീസിനൊരുങ്ങുന്നത്. ശക്തി സുന്ദര്‍ രാജനാണ് ചിത്രം സംവിധാനം ചെയ്യുന്നത്. സെപ്റ്റംബർ എട്ടിനാണ് ചിത്രം തിയേറ്ററിൽ എത്തുക. ഐശ്വര്യ ലക്ഷ്മി ആണ് ചിത്രത്തിൽ നായികയായി എത്തുന്നത്.