തനിക്കെതിരെ ലൈംഗികാരോപണം നടത്തിയ ജൂനിയര്‍ ആര്‍ട്ടിസ്റ്റിനെതിരെ നിയമനടപടി സ്വീകരിക്കുമെന്ന് നടന്‍ ബാബുരാജ്. താന്‍ ‘അമ്മ’യുടെ ജനറല്‍ സെക്രട്ടറി ആകരുതെന്ന് ആഗ്രഹിക്കുന്ന സിനിമാക്കാരാണ് ഈ ആരോപണത്തിന് പിന്നിലുള്ളത് എന്നാണ് ബാബുരാജ് മനോരമ ന്യൂസിനോട് പ്രതികരിച്ചിരിക്കുന്നത്.
ആരോപണം ഉന്നയിച്ച സ്ത്രീ മുഖം മറയ്ക്കാതെ പുറത്തുവരണം. തന്റെ റിസോര്‍ട്ടില്‍ മൂന്ന് വര്‍ഷം ജോലി ചെയ്ത സ്ത്രീയാണ് തനിക്കെതിരെ സംസാരിച്ചത് എന്നാണ് കിട്ടിയ വിവരം. ഇവര്‍ക്ക് സിനിമയുമായി യാതൊരു ബന്ധവുമില്ല.
ഈ ആരോപണത്തിന് പിന്നില്‍ തന്നോട് വൈരാഗ്യമുള്ള സിനിമാക്കാരും റിസോര്‍ട്ടിന്റെ ആള്‍ക്കാരും ഉണ്ടെന്നാണ് മനസിലാക്കുന്നത്. ആരാണ് പരാതിക്കാരി എന്നറിഞ്ഞാല്‍ മാത്രമേ തുടര്‍നടപടി സ്വീകരിക്കാന്‍ സാധിക്കൂ.
ജനറല്‍ സെക്രട്ടറിയാകാന്‍ പോകുന്നു എന്നറിഞ്ഞ് കൊണ്ടുള്ള ആരോപണമാണ്. ഇങ്ങനെയൊരു സംഭവം വരുന്നുണ്ടെന്ന് ഇന്നലെ തന്നെ മനസിലാക്കിയിരുന്നു. ഇതിനായി പല ആളുകളും പൈസയുമായി ഇറങ്ങിയിട്ടുണ്ട്. ഇതിന് പിന്നിലുള്ള ഗൂഢാലോചന പുറത്തുകൊണ്ട് വരും എന്നാണ് ബാബുരാജ് പറയുന്നത്.