മലയാള സിനിമയിൽ വീണ്ടും സജീവമായികൊണ്ടിരിക്കുകയാണ് മലയാളത്തിന്റെ പ്രിയ നായിക ഭാവന. 2023-ൽ പുറത്തിറങ്ങിയ ‘ന്റിക്കാക്കൊരു പ്രേമണ്ടാർന്ന്’ എന്ന ചിത്രത്തിലൂടെയായിരുന്നു വലിയ ഇടവേളയ്ക്ക് ശേഷം ഭാവന മലയാളത്തിലേക്ക് തിരച്ചെത്തിയത്. അതേവർഷം തന്നെ ‘റാണി ദി റിയൽ സ്റ്റോറി’ എന്ന സിനിമയിലും ഭാവന വേഷമിട്ടിരുന്നു. ഇപ്പോഴിതാ ലാൽ ജൂനിയർ സംവിധാനം ചെയ്ത ടൊവിനോ തോമസ് ചിത്രം ‘നടികർ’ എന്ന ചിത്രത്തിലും ഭാവന പ്രധാന വേഷത്തിലെത്തുന്നുണ്ട്. മെയ് 3 നാണ് ചിത്രം തിയേറ്ററുകളിൽ എത്തുന്നത്.
ഇനി സിനിമയിൽ അഭിനയിക്കില്ലെന്ന തീരുമാനമെടുത്ത് നിൽക്കുന്ന ഘട്ടത്തിലാണ് ടൊവിനോ ചിത്രം ‘നടികർ’ എന്ന ചിത്രത്തിന്റെ ഭാഗമാവുന്നത് പറയുകയാണ് ഭാവന. കൂടാതെ സംവിധായകൻ ജീൻ പോൾ ലാലുമായുള്ള സൗഹൃദവും വലിയ രീതിയിൽ ഗുണം ചെയ്തെന്ന് ഭാവന പറയുന്നു.
“എനിക്കും ജീനിനുമിടയിൽ വളരെക്കാലമായി ശക്തമായ സൗഹൃദമുണ്ട്. എനിക്ക് അദ്ദേഹത്തില്‍ വിശ്വാസമുണ്ട്. കാരണം അദ്ദേഹം സിനിമയോട് തീര്‍ത്തും പ്രൊഫഷണല്‍ സമീപനമുള്ള വളരെ വിദഗ്ദ്ധനായ സംവിധായകനാണ്. രണ്ടാമതൊന്ന് ചിന്തിക്കാതെ എനിക്ക് ഈ സിനിമയോട് ഓക്കെ പറയാന്‍ പറ്റുമായിരുന്നു. ടൊവിനോ ഇപ്പോള്‍ കുറച്ചുകൂടി സ്വയം മിനുക്കിയെടുക്കുകയും കൂടുതല്‍ ആത്മവിശ്വാസമുള്ള ഒരു നടനായി മാറുകയും ചെയ്തുവെന്നാണ് എനിക്ക് തോന്നുന്നത്.” എന്നാണ് മൈൽസ്റ്റോൺ മേക്കേഴ്സിന് നല്കിയ അഭിമുഖത്തിൽ ഭാവന പറഞ്ഞത്.
ടൊവിനോ അവതരിപ്പിക്കുന്ന ഡേവിഡ് പടിക്കൽ എന്ന സൂപ്പർ സ്റ്റാറിന്റെ സിനിമാ ജീവിതവും അതുമായി ബന്ധപ്പെട്ട് വ്യക്തി ജീവിതത്തിൽ ഉടലെടുക്കുന്ന സംഘർഷങ്ങളുമാണ് ചിത്രത്തിന്റെ പ്രമേയമെന്നാണ് ട്രെയ്ലറിലൂടെ ലഭിക്കുന്ന സൂചന.
‘പുഷ്പ– ദ റൈസ്’ നിര്‍മ്മിച്ച മൈത്രി മൂവി മേക്കേഴ്സ് നടികരിലൂടെ മലയാളത്തിലേക്ക് ചുവടുവെക്കുന്നുവെന്നതും ശ്രദ്ധേയമായ കാര്യമാണ്. മൈത്രി മൂവി മേക്കേഴ്‌സിന്റെ വൈ.നവീനും വൈ.രവി ശങ്കറിനോടുമൊപ്പം, അലന്‍ ആന്റണിയും അനൂപ് വേണുഗോപാലും നേതൃത്വം നല്‍കുന്ന ഗോഡ്സ്പീടും ചിത്രത്തിന്റെ നിര്‍മാണ പങ്കാളിയാണ്.
ധ്യാൻ ശ്രീനിവാസൻ, അനൂപ് മേനോൻ, ഷൈൻ ടോം ചാക്കോ, ലാൽ, ബാലു വർഗീസ്, സുരേഷ് കൃഷ്ണ, സംവിധായകൻ രഞ്ജിത്ത്, ഇന്ദ്രൻസ്, മധുപാൽ, ഗണപതി, വിജയ് ബാബു, അൽത്താഫ് സലിം, മണിക്കുട്ടൻ, മേജർ രവി, മൂർ, സുമിത്, നിഷാന്ത് സാഗർ, അഭിറാം പൊതുവാൾ, ചന്ദു സലിംകുമാർ, ശ്രീകാന്ത് മുരളി, അർജുൻ നന്ദകുമാർ, ദിവ്യ പിള്ള തുടങ്ങീ വമ്പൻ താരനിരയാണ് ചിത്രത്തിൽ അണിനിരക്കുന്നത്.