താന്‍ സായ് പല്ലവിയുടെ ആരാധകനാണെന്ന് പറഞ്ഞ് സംവിധായകന്‍ മണിരത്‌നം. ‘അമരന്‍’ എന്ന പുതിയ ചിത്രത്തിന്റെ പ്രീ റിലീസ് ചടങ്ങിനിടെയാണ് മണിരത്‌നം സംസാരിച്ചത്. സായ് പല്ലവിക്കൊപ്പം പുതിയൊരു സിനിമ ചെയ്യാനുള്ള ആഗ്രഹവും മണിരത്‌നം പറയുന്നുണ്ട്. സംവിധായകന്റെ വാക്കുകള്‍ക്ക് സായ് പല്ലവിയും മറുപടി നല്‍കിയിട്ടുണ്ട്.
”ഞാന്‍ നിങ്ങളുടെ വലിയൊരു ആരാധകനാണ്. നിങ്ങള്‍ക്കൊപ്പം ഒരു സിനിമ ചെയ്യണമെന്ന ആഗ്രഹമുണ്ട്” എന്നാണ് മണിരത്‌നം പറഞ്ഞത്. മണിരത്‌നത്തിന്റെ സിനിമകള്‍ കണ്ട വെളിച്ചത്തിലാണ് താന്‍ തിരക്കഥകള്‍ തിരഞ്ഞെടുക്കാറുള്ളത് എന്നാണ് ഇതിന് മറുപടിയായി സായ് പറയുന്നത്.
”സിനിമയിലേക്ക് വരുന്നതിന് മുമ്പ് എനിക്ക് അധികം സംവിധായകരെ അറിയില്ലായിരുന്നു. എനിക്ക് ആകെ അറിയാവുന്ന ഒരു സംവിധായകന്‍ മണിരത്‌നമായിരുന്നു. ഞാന്‍ ഇന്ന് ഓരോ കഥാപാത്രവും തിരക്കഥയും ശ്രദ്ധയോടെ തിരഞ്ഞെടുക്കുന്നതിന് കാരണം അദ്ദേഹമാണ്” എന്നാണ് സായ് പല്ലവിയുടെ വാക്കുകള്‍.
അതേസമയം, യുദ്ധത്തിന്റെ പശ്ചാത്തലത്തില്‍ ഒരുക്കുന്ന അമരന്‍ ഒക്ടോബര്‍ 31ന് ആണ് തിയേറ്ററുകളില്‍ എത്തുക. രാജ്കുമാര്‍ പെരിയസ്വാമി സംവിധാനം ചെയ്യുന്ന ചിത്രത്തില്‍ ശിവകാര്‍ത്തികേയന്‍ ആണ് നായകന്‍. കമല്‍ ഹാസന്റെ രാജ് കമല്‍ ഫിലിംസ് ആണ് ചിത്രം നിര്‍മ്മിക്കുന്നത്.