സൂപ്പർസ്റ്റാർ രജനികാന്ത് ചേർത്തു പിടിച്ചിരിക്കുന്ന ബോളിവുഡിലെ എക്കാലത്തെയും സൂപ്പർ താരത്തിന്റെ ചിത്രമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ഇതാരാണ് എന്ന ചോദ്യങ്ങളാണ് ചിത്രത്തിന് താഴെ വന്നുകൊണ്ടിരിക്കുന്നത്. ബോളിവുഡ് താരം ഹൃതിക് റോഷൻ ആണ് ഈ വൈറൽ ചിത്രത്തിൽ.
ഹൃതിക് റോഷന്റെ അച്ഛൻ രാകേഷ് റോഷൻ നിർമിച്ച് അഭിനയിച്ച ഭഗവാൻ ദാദ (1986) എന്ന സിനിമയിലേതാണ് ഈ ചിത്രം. രജനിയുടെ ദത്തുപുത്രന്റെ വേഷമാണ് നടൻ അവതരിപ്പിച്ചത്. ശ്രീദേവി, ഡാനി ഡെൻസോങ്പ, ടീന അംബാനി എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരുന്നു.
ഹൃതിക് റോഷന്റെ മുത്തച്ഛനായ ജെ ഓം പ്രകാശ് ആണ് ചിത്രം സംവിധാനം ചെയ്തത്. ഭഗവാൻ ദാദയിലെ ഹൃത്വിക്കിന്റെ പ്രകടനമാണ് തന്റെ മകന് ഒരു നടനാകാൻ സാധ്യതയുണ്ടെന്ന കാര്യം രാകേഷ് റോഷൻ തിരിച്ചറിഞ്ഞത് എന്നാണ് റിപ്പോർട്ട്.
ഇന്ത്യയിൽ ഏറ്റവും കൂടുതൽ പ്രതിഫലം വാങ്ങുന്ന നടന്മാരിൽ ഒരാളാണ്‌ ഹൃതിക് റോഷൻ. അദ്ദേഹത്തിന്റെ അഭിനയവും നൃത്തവും സിനിമയിലെ ആക്ഷൻ രംഗങ്ങളും എല്ലാം ആരാധകർക്ക് ഏറെ പ്രിയപ്പെട്ടതാണ്.