ഷാരൂഖ് ഖാനും സംവിധായകന്‍ അറ്റ്‌ലിക്കും കത്തുമായി സംവിധാകന്‍ സിസി. ഷാരൂഖ് ഖാന്റെ പുതിയ ചിത്രമായ ‘ജവാന്‍’ എന്ന പേര് എങ്ങനെയാണ് സെന്‍സര്‍ ബോര്‍ഡിനെ പേടിക്കാതെ കിട്ടിയത് എന്ന് ചോദിച്ചു കൊണ്ടാണ് സംവിധായകന്റെ കത്ത്. ‘കൊറോണ ധവാന്‍’ എന്ന ചിത്രത്തിന്റെ സംവിധായകനാണ് സിസി.
സെന്‍സര്‍ ബോര്‍ഡിനെ പേടിച്ച് കൊറോണ ജവാന്‍ എന്ന പേര് ‘കൊറോണ ധവാന്‍’ എന്നാക്കി മാറ്റി. ഒരു കുപ്പി പോലും ജവാന്‍ കാണിക്കാത്ത നിങ്ങള്‍ക്ക് ജവാന്‍ കിട്ടിയതിന്റെ ടെക്‌നിക്ക് എന്താണ് എന്നാണ് സംവിധായകന്‍ കത്ത് എഴുതുന്ന വീഡിയോ പങ്കുവച്ച് ചോദിക്കുന്നത്. കൂടാതെ ഓഗസ്റ്റ് 4ന് പുറത്തിറങ്ങുന്ന ചിത്രം കുടുംബസമേതം കാണാനും സംവിധായകന്‍ ഷാരൂഖ് ഖാനോട് ആവശ്യപ്പെടുന്നുണ്ട്.
സംവിധായകന്റെ കത്ത്:
പ്രിയപ്പെട്ട ഷാരൂഖ് ഇക്ക (ഷാരൂഖ് ഖാന്‍) വളരെ വേണ്ടപ്പെട്ട അറ്റ്‌ലി. എന്റെ പേര് സിസി. ഞാന്‍ ഇപ്പോ ഈ കത്ത് മലയാളത്തില്‍ എഴുതിയാല്‍ നിങ്ങള്‍ എങ്ങനെ വായിക്കും എന്ന് എനിക്ക് അറിയില്ല. ഹിന്ദിയിലും ഇംഗ്ലീഷിലും എഴുതാന്‍ ആണെങ്കില്‍ എനിക്ക് വലിയ വശമില്ല. ഞാനൊരു മലയാള സിനിമ സംവിധാനം ചെയ്തു. ആ സിനിമയുടെ പേര് കൊറോണ ജവാന്‍ എന്നായിരുന്നു.
ഒരു ലോഡ് ജവാന്‍ ഞാന്‍ കാണിച്ചിട്ടും എനിക്ക് ആ പേര് കിട്ടിയില്ല. സെന്‍സര്‍ ബോര്‍ഡ് പറഞ്ഞു, ജവാന്‍ പറ്റില്ലാന്ന്. കേട്ടറിവ് വച്ച് ഒരു കുപ്പി പോലും ജവാന്‍ കാണിക്കാത്ത നിങ്ങള്‍ക്ക് ജവാന്‍ കിട്ടി എന്നറിഞ്ഞു. അതിപ്പോ എന്താ അതിന്റെയൊരു ടെക്‌നിക്ക്? സെന്‍സര്‍ ബോര്‍ഡിനെ പേടിച്ചിട്ട് ഞാന്‍ എന്തായാലും ജവാന്‍, ധവാന്‍ ആക്കിയിട്ടുണ്ട്. ഇനി ഇത് ശിഖര്‍ ധവാന്‍ അറിഞ്ഞാല്‍ എന്താണാവോ പുകില്…!
അധികം നീട്ടണില്ല. എന്തായാലും ഞങ്ങള്‍ടെ ജവാന്‍ അല്ല കൊറോണ ധവാന്‍ ഈ വരുന്ന ഓഗസ്റ്റ് 4ന് റിലീസ് ആവുകയാണ്. ബോംബേലൊക്കെ റിലീസ് ഉണ്ടെന്ന് പ്രൊഡ്യൂസര്‍ പറഞ്ഞു. ഇക്കേടെ ജവാന്റെ പോലെ അടി ഇടി ഒന്നും ഇല്ലാട്ടാ ഇതില്. കോമഡി മാത്രം. ഇക്ക എന്തായാലും കുടുംബസമേതം പോയി പടം കാണണം. മറുപടി പ്രതീക്ഷിക്കുന്നില്ല. എന്ന് മലയാള സിനിമയിലേക്ക് ചുവടുവയ്ക്കുന്ന സംവിധായകന്‍ സിസി.
View this post on Instagram