ക്രോണിക് ബാച്ചലർ എന്ന ചിത്രത്തിലൂടെ സംഗീത സംവിധായകനായി മലയാളത്തിൽ അരങ്ങേറ്റം കുറിച്ച സംഗീത സംവിധായകനാണ് ദീപക് ദേവ്. പിന്നീട് ഉദയാണ് താരം, നരൻ, പുതിയ മുഖം, ദ്രോണ, ക്രിസ്റ്റ്യന് ബ്രദേഴ്സ്, ഉറുമി, ഹണി ബീ, ബൈസിക്കിൾ തീവ്സ്, സൺഡേ ഹോളിഡേ, ലൂസിഫർ തുടങ്ങീ മലയാളത്തിലെ ഹിറ്റ് സിനിമകളിലെല്ലാം ദീപക് ദേവിന്റെ പാട്ടുകളും പശ്ചാത്തല സംഗീതവും ഉണ്ടായിട്ടുണ്ട്.
അടുത്തിടെ പുറത്തിറങ്ങിയ ജിസ് ജോയ് ചിത്രം തലവനിലും ലൂസിഫറിന്റെ രണ്ടാം ഭാഗമായ ‘എമ്പുരാനി’ലും ദീപക് ദേവാണ് സംഗീത സംവിധാനം നിർവഹിക്കുന്നത്. ഇപ്പോഴിതാ എമ്പുരാനെ കുറിച്ച് ദീപക് ദേവ് പറഞ്ഞ വാക്കുകളാണ് ചർച്ചയാവുന്നത്. പ്രേക്ഷകർ മനസിൽ കണ്ട എമ്പുരാൻ എന്താണോ അത് തന്നെയാണ് പൃഥ്വി ഷൂട്ട് ചെയ്ത് വെച്ചിരിക്കുന്നത് എന്നാണ് ദീപക് ദേവ് പറഞ്ഞത്.
“എമ്പുരാന്റെ ഷൂട്ട് ഇപ്പോൾ നടന്നു കൊണ്ടിരിക്കുകയാണ്. പൃഥ്വി ഷൂട്ടിങ്ങ് നടക്കുമ്പോൾ തന്നെ അവിടുന്ന് എക്സൈറ്റിങ്ങായ കാര്യങ്ങൾ ഷൂട്ട് ചെയ്താൽ ഉടനെ എനിക്ക് ടെക്സ്റ്റ് ചെയ്യും. ഭീകര സംഭവം വരുന്നുണ്ട്. ഇനി നിങ്ങളുടെ കൈയിലാണ് ഇരിക്കുന്നതെന്ന് പറഞ്ഞ് എന്നെ പേടിപ്പിക്കും.
അങ്ങനെ ഷൂട്ട് ചെയ്‌ത കുറേ സംഭവങ്ങൾ എനിക്ക് അയച്ചു തന്നിട്ടുണ്ട്. അത് കണ്ടപ്പോൾ തന്നെ എനിക്ക് ഒരുപാട് സന്തോഷം തോന്നി. കാരണം പൃഥ്വി കഥ പറയുമ്പോൾ നമ്മൾ മനസിൽ കണ്ട എമ്പുരാൻ എന്താണോ, അത് തന്നെയാണ് പൃഥ്വി ഷൂട്ട് ചെയ്‌തതും. നല്ല സ്റ്റോറി ടെല്ലറാണ് അവൻ, വളരെ ഡീറ്റെയിൽഡാണ്. ചില സമയത്ത് ഇത്ര ഡീറ്റെയിൽസ് നമുക്ക് ആവശ്യമുണ്ടോയെന്ന് പോലും തോന്നിപോകും.” എന്നാണ് റെഡ് എഫ്എമ്മിന് നൽകിയ അഭിമുഖത്തിൽ ദീപക് ദേവ് പറഞ്ഞത്.
