കന്നഡ സൂപ്പര്‍താരം ധ്രുവ സര്‍ജ നായകനാകുന്ന ‘മാര്‍ട്ടിന്‍’ ചിത്രത്തിന്റെ ടീസര്‍ ഈയടുത്ത ദിവസമാണ് റിലീസായത്. ടീസറിലെ സംഘട്ടന രംഗങ്ങള്‍ ചര്‍ച്ചയാവുകയും ചെയ്തിരുന്നു. ടീസര്‍ ലോഞ്ചിനിടെ രണ്ട് വിദേശ താരങ്ങള്‍ക്കൊപ്പമുള്ള അനുഭവവും ധ്രുവ സര്‍ജ പങ്കുവച്ചിരുന്നു.
ഇങ്ങനെ രണ്ടു പേരെയാണ് എതിര്‍ക്കേണ്ടതെന്ന് അറിഞ്ഞിരുന്നില്ല എന്നാണ് ധ്രുവ പറയുന്നത്. മുന്‍ യു.എഫ്.സി ചാമ്പ്യന്‍ നഥാന്‍ ജോണ്‍സ്, നെക്‌സില എന്നിവര്‍ക്കൊപ്പമായിരുന്നു ധ്രുവയുടെ ഒരു സംഘട്ടനരംഗം. ഇതിന്റെ ഏതാനും ഭാഗങ്ങളും ടീസറിലുണ്ടായിരുന്നു.
ഏറ്റവും നീണ്ട കഴുത്തുള്ള നെക്‌സില എന്ന ബോഡി ബില്‍ഡര്‍, തന്റെ പ്രിയപ്പെട്ട നഥാന്‍ ജോണ്‍സ് എന്നിവര്‍ക്കൊപ്പമാണ് ഒരു സംഘട്ടനരംഗം അഭിനയിക്കേണ്ടത് എന്ന് തനിക്കറിയില്ലായിരുന്നു. ഇവരുമായി പോരാടുന്നതിന് ശരീരഭാരം കൂട്ടണമായിരുന്നു. വളരെ ബുദ്ധിമുട്ടി.
അവരില്‍ നിന്ന് ഒന്ന് രണ്ട് അടികള്‍ ശരിക്ക് കൊണ്ടു. ഇത് സിനിമയാണ്, ശരിക്കുമുള്ള പോരാട്ടമല്ലെന്ന് അവരോട് അപേക്ഷിക്കേണ്ടി വന്നിരുന്നു എന്നാണ് ധ്രുവ സര്‍ജ ഇപ്പോള്‍ വ്യക്തമാക്കിയിരിക്കുന്നത്. അതേസമയം, കന്നഡ, തെലുങ്ക്, തമിഴ്, മലയാളം, ഹിന്ദി ഭാഷകളിലാണ് മാര്‍ട്ടിന്‍ റിലീസ് ആകുന്നത്.
അര്‍ജുന്‍ സര്‍ജ കഥയെഴുതിയിരിക്കുന്ന ചിത്രം വാസവി എന്റര്‍പ്രൈസിന്റെ ബാനറില്‍ ഉദയ് കെ മെഹ്തയാണ് നിര്‍മ്മിക്കുന്നത്. വൈഭവി ശാണ്ഡില്യ, അന്വേഷി ജെയ്ന്‍, ചിക്കണ്ണ, മാളവിക അവിനാഷ്, അച്യുത് കുമാര്‍, നികിതിന്‍ ധീര്‍, നവാബ് ഷാ, രോഹിത് പതക് എന്നിവരാണ് ചിത്രത്തിലെ മറ്റ് അഭിനേതാക്കള്‍.