‘സ്ഫടികം’ ചിത്രത്തിന്റെ റീമാസ്റ്ററിംഗ് പതിപ്പ് വീണ്ടും എത്തുകയാണ്. ചിത്രത്തിന്റെ 24ാം വാര്‍ഷിക വേളയിലായിലാണ് സംവിധായകന്‍ ഇക്കാര്യം അറിയിക്കുന്നത്. എന്നാല്‍ ചിത്രത്തിലെ ‘ഏഴിമല പൂഞ്ചോല ‘എന്ന പാട്ട് റീമാസ്റ്ററിംഗ് ചെയ്ത് ഇറക്കിയതായി അവകാശപ്പെടുന്ന ഒരു വീഡിയോ കണ്ടെന്നും, അത് ഏത് തരത്തിലുള്ള റീ മാസ്റ്ററിംഗ് ആണ് ചെയ്തിരിക്കുന്നതെന്ന് അറിയില്ലെന്നും സംവിധായകന്‍ പറയുന്നു.
ഫെയ്‌സ്ബുക്കില്‍ പങ്കുവച്ച പോസ്റ്റിലൂടെയാണ് ഭദ്രന്റെ പ്രതികരണം. സിനിമ റീമാസ്റ്ററിംഗ് ചെയ്ത് എത്രയും പെട്ടെന്ന് പുറത്തിറക്കാനുള്ള ശ്രമത്തിലാണ് താനും മറ്റ് അണിയറ പ്രവര്‍ത്തകരും എന്നും അദ്ദേഹം വ്യക്തമാക്കി.
ഭദ്രന്റെ കുറിപ്പ്:
എന്നെ സ്‌നേഹിക്കുന്ന,സിനിമയെ സ്‌നേഹിക്കുന്ന പ്രേക്ഷകരുടെ ശ്രദ്ധയിലേയ്ക്ക് സന്തോഷപൂര്‍വ്വം ഒരു കാര്യം അറിയിക്കട്ടെ…. സ്ഫടികം സിനിമയിലെ ‘ഏഴിമല പൂഞ്ചോല’ എന്ന പാട്ട് റീമാസ്റ്റര്‍ ചെയ്ത് ഇറക്കിയതായി അവകാശപ്പെടുന്ന ഒരു വീഡിയോ കാണുക ഉണ്ടായി… അതിന്റെ കീഴെ ചേര്‍ത്തിരിക്കുന്ന ആരാധകരുടെ എക്‌സൈറ്റിംഗ് ആയുള്ള കമന്റുകളും കണ്ടു. സന്തോഷം.
അത് ഏത് തരത്തിലുള്ള റീമാസ്റ്ററിംഗ് ആണ് അവര്‍ ചെയ്തിരിക്കുന്നത് എന്ന് ഞങ്ങള്‍ക്കറിയില്ല.. ആര് ചെയ്തിരിക്കുന്നു എന്നും അറിയില്ല… അതേ രൂപത്തില്‍ സിനിമ കണ്ടാല്‍ കൊള്ളാം എന്നുള്ള കമന്റുകള്‍ എന്നെ തെല്ല് അലോസരപ്പെടുത്താതിരുന്നില്ല.. ഞാന്‍ കൂടി ഉള്‍പ്പെട്ട ജിയോമെട്രിക് ഫിലിം ഹൗസ് എന്ന കമ്പനി, 10 മടങ്ങ് ക്വാളിറ്റിയിലും ടെക്‌നിക്കല്‍ എക്‌സലെന്‍സിയിലും അതിന്റെ ഒറിജിനല്‍ നെഗറ്റീവില്‍ നിന്നുള്ള പെര്‍ഫക്ട് റീമാസ്റ്ററിംഗ് പ്രൊഡ്യൂസര്‍ ആര്. മോഹനില്‍ നിന്ന് വാങ്ങി തിയേറ്ററില്‍ എത്തിക്കാനുള്ള അവസാന പണിപ്പുരയില്‍ ആണ്.
ചെന്നൈ, ഫോര്‍ ഫ്രെയ്‌സ് സൗണ്ട് കമ്പനിയില്‍ അതിന്റെ 4കെ അറ്റ്‌മോസ് മിക്‌സിംഗും ഇന്ററസ്റ്റിംഗ് ആയുള്ള ആഡ് ഓണുകളും ചേര്‍ത്ത് കൊണ്ട് തിയേറ്റര്‍ റിലീസിലേക്ക് ഒരുക്കി കൊണ്ടിരിക്കുകയാണ്.. ഈ വാര്‍ത്ത കഴിയുമെങ്കില്‍ ഒന്ന് ഷെയര്‍ ചെയ്താല്‍ നല്ലതായിരുന്നു… സ്‌നേഹത്തോടെ ഭദ്രന്‍.