മോഹന്‍ലാല്‍-സിദ്ദിഖ് കൂട്ടുകെട്ടിലൊരുങ്ങുന്ന “ബിഗ് ബ്രദര്‍” നാളെ റിലീസിനെത്തുകയാണ്. സസ്‌പെന്‍സ് ആക്ഷന്‍ ത്രില്ലറായാണ് ചിത്രം എത്തുന്നത്. ബിഗ് ബ്രദറിന് മമ്മൂട്ടി നായകനായെത്തിയ “ഹിറ്റ്ലര്” എന്ന ചിത്രവുമായി സാമ്യമുണ്ടോ എന്ന ചോദ്യത്തിന് മറുപടി നല്‍കിയിരിക്കുകയാണ് സംവിധായകന്‍ സിദ്ദിഖ്.
“കുടുംബത്തിന്റെ രക്ഷകനാകുന്ന നായകന്‍. അതാണ് മോഹന്‍ലാല്‍ ബിഗ് ബ്രദറില്‍ അവതരിപ്പിക്കുന്ന കഥാപാത്രം. ഹിറ്റ്ലര്, ക്രോണിക്ക് ബാച്ചിലര്‍ തുടങ്ങിയ ചിത്രങ്ങളിലും സമാനമായ കഥാപാത്രങ്ങളുണ്ട്. പക്ഷേ കഥ വേറെയാണ്”” എന്ന് സിദ്ദിഖ് ദി ഹിന്ദുവിനോട് പറഞ്ഞു. 1996ല്‍ എത്തിയ ഹിറ്റ്ലര് സഹോദരിമാരോട് അളവറ്റ സ്‌നേഹമുള്ള ഒരു മൂത്തസഹോദരന്റെ കഥയാണ് പറഞ്ഞത്. 2003ല്‍ എത്തിയ ക്രോണിക് ബാച്ചിലറിലും സഹോദരിയോട് സ്‌നേഹമുള്ള മൂത്തസഹോദരന്റെ കഥയാണ് പറഞ്ഞത്.
25 കോടി മുതല്‍മുടക്കില്‍ ഒരുങ്ങുന്ന ചിത്രത്തിന്റെ തിരക്കഥ നിര്‍വഹിക്കുന്നതും സിദ്ദിഖ് തന്നെയാണ്. ഷാമാന്‍ ഇന്റര്‍നാഷനലിന്റെ ബാനറില്‍ സിദ്ധിഖ്, ഷാജി ന്യൂയോര്‍ക്ക്, മനു ന്യൂയോര്‍ക്ക്, ജെന്‍സോ ജോസ്, വൈശാഖ് രാജന്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
മിര്‍ണ മേനോന്‍ ആണ് നായിക. അനൂപ് മേനോന്‍, വിഷ്ണു ഉണ്ണികൃഷ്ണന്‍, സര്‍ജോനാ ഖാലിദ്, സിദ്ധിഖ്, ദേവന്‍, ടിനി ടോം, ഇര്‍ഷാദ്, ഷാജു ശ്രീധര്‍, ജനാര്‍ദ്ദനന്‍, ദിനേശ് പണിക്കര്‍, മുകുന്ദന്‍, മജീദ്, അപ്പ ഹാജ, നിര്‍മ്മല്‍ പാലാഴി, അബു സലീം, ജയപ്രകാശ്, സുധി കൊല്ലം, ശംഭൂ, ഹണി റോസ് എന്നിവര്‍ പ്രധാന താരങ്ങളാകുന്നു. ബോളിവുഡ് താരങ്ങളായ അര്‍ബാസ് ഖാന്‍, ചേതന്‍ ഹന്‍സ് രാജ്, ആസിഫ് ബസ്റ, ആവാന്‍ ചൗധരി എന്നിവരും ബിഗ് ബ്രദറില്‍ അഭിനയിക്കുന്നുണ്ട്.
