ബിലാലിന്റെ രണ്ടാം വരവിനായി ആവേശത്തോടെ കാത്തിരിക്കുന്ന ആരാധകരോട് ബിഗ് ബിയെക്കുറിച്ച് ദുല്‍ഖര്‍ സല്‍മാന്‍. ദുബായ് ജീവിതത്തിനിടയില്‍ നാടിനേയും വാപ്പച്ചിയേയും മിസ് ചെയ്യുമ്പേള്‍ കാണുന്ന സിനിമയായിരുന്നു
ബിഗ് ബിയെന്ന് ദുല്‍ഖര്‍ സല്‍മാന്‍. ഷാര്‍ജയില്‍ നടന്ന അവാര്‍ഡ്ദാന ചടങ്ങിനിടെയാണ് ബിഗ് ബിയെക്കുറിച്ച് ദുല്‍ഖര്‍ പറഞ്ഞത്.
“എന്റെ ദുബായ് ജീവിതവുമായി വലിയ ബന്ധമുള്ള സിനിമയാണ് ബിഗ്ബി. വര്‍ക്കിനായി ദുബായിലെത്തിയ സമയം,എല്ലാ വീക്കെന്‍ഡും കാണുന്ന സിനിമയായിരുന്നു ബിഗ് ബി. നാട് മിസ് ചെയ്യുമ്പോഴും വാപ്പച്ചിയെ മിസ് ചെയ്യുമ്പോഴും ഈ സിനിമ കാണുമായിരുന്നു. ആണ്‍കുട്ടികള്‍ക്ക് ഒന്നിച്ചിരുന്ന് ആസ്വദിച്ച് കാണാവുന്ന സിനിമയാണത്. അതിന്റെ ബാക്ക്ഗ്രൗണ്ട് സ്‌കോറു പോലും നമ്മുടെ ലൈഫിന്റേത് പോലെയാണ്.
പാര്‍ട്ട് രണ്ടും മുന്നുമൊക്കെ വന്നാലും ബിഗ് ബിയിലെ കഥാപാത്രങ്ങള്‍ എന്നും നിലനില്‍ക്കും.
ബിഗ് ബി രണ്ടില്‍ ഉണ്ടാകുമോ എന്ന ചോദ്യത്തിന് ഉത്തരം നല്‍കുമ്പോള്‍ ബിഗ്ബിയെക്കുറിച്ച് വാചാലനാവുകയായിരുന്നു ദുല്‍ഖര്‍.
അമല്‍ നീരദ് 2007ല്‍ സംവിധാനം ചെയ്ത ബിഗ്ബിയുടെ രണ്ടാംഭാഗം വരുന്നുവെന്ന വാര്‍ത്ത ആവേശത്തോടെയാണ് പ്രേക്ഷകര്‍ സ്വീകരിച്ചത്. അല്‍ഫോന്‍സ് സംഗീതം നല്‍കിയ ചിത്രത്തിന് ഗോപീ സുന്ദറാണ് പശ്ചാത്തല സംഗീതം ഒരുക്കിയത്.ദുല്‍ഖര്‍ ബിഗ്ബി രണ്ടാം ഭാഗത്തില്‍ എത്തുമെന്ന് സാമൂഹിക മാധ്യമങ്ങളില്‍ പ്രചരിച്ചിരുന്നു.
