മമ്മൂട്ടി ആരാധകര്‍ ഏറെ കാത്തിരിക്കുന്ന സിനിമകളില്‍ ഒന്നാണ് ‘ബിലാല്‍’. അമല്‍ നീരദ്-മമ്മൂട്ടി കൂട്ടുകെട്ടില്‍ എത്തിയ രണ്ടാം ഭാഗമായ ബിലാലിനെ കുറിച്ച് ദുല്‍ഖര്‍ സല്‍മാന്‍ പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്. ബിലാലില്‍ ദുല്‍ഖറും എത്തും എന്ന വാര്‍ത്തകളോടാണ് താരം പ്രതികരിച്ചത്.
താനും വാപ്പച്ചിയും ബിലാലില്‍ സ്‌ക്രീന്‍ പങ്കിടുന്നതായുള്ള അഭ്യൂഹങ്ങള്‍ കേട്ടിരുന്നു, എന്നാലത് എവിടെ നിന്ന് ഉണ്ടായി എന്ന് അറിയില്ല. ഇതില്‍ അഭിപ്രായം പറയാനുള്ള കൃത്യമായ ആള്‍ താനല്ല. വാപ്പച്ചിയുടെ വിജയ ചിത്രമാണ് ബിഗ് ബി. ചിത്രത്തിന്റെ സീക്വലില്‍ ഡയറക്ടറും സ്‌ക്രിപ്റ്റും ആവശ്യപ്പെടുന്നുണ്ടെങ്കില്‍ അത് സംഭവിക്കട്ടെ.
അങ്ങനെ സംഭവിച്ചാല്‍ വളരെ വലിയ കാര്യമാണ്, എന്നാല്‍ ആവശ്യമുണ്ടെങ്കില്‍ മാത്രമേ അതുണ്ടാവുകയുള്ളു എന്നാണ് ദുല്‍ഖര്‍ ബോളിവുഡ് ലൈഫിന് നല്‍കിയ അഭിമുഖത്തില്‍ പറയുന്നത്. അതേസമയം, ബിലാല്‍ ഒരുങ്ങുന്നതായുള്ള വാര്‍ത്തകള്‍ വന്നിരുന്നുവെങ്കിലും നിലവില്‍ വിവരങ്ങള്‍ ഒന്നുമില്ല.
ബിലാലിന് മുമ്പ് അമല്‍ നീരദ്-മമ്മൂട്ടി കൂട്ടുകെട്ടില്‍ എത്തിയ ഭീഷ്മപര്‍വ്വം ഗംഭീര വിജയം നേടിയിരുന്നു. മൈക്കിള്‍ എന്ന കഥാപാത്രത്തെയാണ് മമ്മൂട്ടി ചിത്രത്തില്‍ അവതരിപ്പിച്ചത്. ചിത്രത്തിലെ ഡയലോഗുകളും ഏറെ ശ്രദ്ധ നേടുകയും സോഷ്യല്‍ മീഡിയയില്‍ വൈറലാവുകയും ചെയ്തിരുന്നു.
