തമിഴ്‌നാട്ടിലേത് എന്ന പോലെ കേരളത്തിലും ‘ജയിലര്‍’ തരംഗമാണ്. 40 കോടിയോളം രൂപയാണ് ചിത്രത്തിന് കേരളത്തില്‍ നിന്നും മാത്രം ലഭിച്ചിരിക്കുന്നത്. ജയിലറിന്റെ വിജയത്തെ കുറിച്ചും തന്റെ പുതിയ ചിത്രം ‘കിംഗ് ഓഫ് കൊത്ത’യെ കുറിച്ചും ദുല്‍ഖര്‍ സല്‍മാന്‍ പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്.
ചെന്നൈയില്‍ നടന്ന പ്രൊമോഷന്‍ പരിപാടിയിലാണ് നടന്‍ സംസാരിച്ചത്. ”യഥാര്‍ത്ഥ രാജാവ് ആരെന്ന് ജയിലര്‍ ചിത്രത്തില്‍ സൂപ്പര്‍ സ്റ്റാര്‍ രജനികാന്ത് തന്നെ നമുക്ക് കാട്ടി തന്നു. ജയിലറിലൂടെ അദ്ദേഹം എല്ലാവരെയും കീഴടക്കിയിരിക്കുകയാണ്.”
”തിയേറ്ററുകളെല്ലാം ഇപ്പോള്‍ രജനി സാറിന്റെ ചിത്രം കാണാനായി തിങ്ങിനിറഞ്ഞിരിക്കുന്നു. അതില്‍ ഒരു ശതമാനം പ്രേക്ഷകര്‍ കിംഗ് ഓഫ് കൊത്ത കാണാന്‍ വന്നാല്‍, അത് തന്നെ ഞങ്ങള്‍ക്ക് വലിയ നേട്ടമാണ്” എന്നാണ് ദുല്‍ഖര്‍ പറയുന്നത്. അതേസമയം, ദുല്‍ഖരിന്റെ കരിയറിലെ ഏറ്റവും വലിയ ബജറ്റിലാണ് കിംഗ് ഓഫ് കൊത്ത ഒരുങ്ങുന്നത്.
അതേസമയം, ഓഗസ്റ്റ് 24ന് ആണ് കിംഗ് ഓഫ് കൊത്ത ആഗോളതലത്തില്‍ റിലീസ് ചെയ്യുന്നത്. ഷബീര്‍ കല്ലറക്കല്‍, പ്രസന്ന, ചെമ്പന്‍ വിനോദ്, ഷമ്മി തിലകന്‍, ഗോകുല്‍ സുരേഷ്, വടചെന്നൈ ശരണ്‍, ഐശ്വര്യാ ലക്ഷ്മി, നൈല ഉഷ, ശാന്തി കൃഷ്ണ, അനിഖ സുരേന്ദ്രന്‍ എന്നിവരാണ് ചിത്രത്തില്‍ പ്രധാന വേഷങ്ങളില്‍ എത്തുന്നത്.