മലയാള സിനിമയിലെ അഭിനേതാക്കളുടെ സംഘടനയായ ‘അമ്മ’യുടെ പ്രസിഡന്റ് ആയി മോഹൻലാൽ തന്നെ തുടരുമെന്ന് ഇടവേള ബാബു. എന്നാൽ താൻ ജനറൽ സെക്രട്ടറി സ്ഥാനം ഒഴിയുമെന്നും ഇടവേള ബാബു പറയുന്നു.
സംഘടനാ ഇപ്പോൾ ഒരു ട്രാൻസ്പോർട്ട് വണ്ടി പോലെയാണ് പ്രവൃത്തിക്കുന്നതെന്നും അതിന് മാറ്റം വരണമെങ്കിൽ താൻ മാറണമെന്നും പറഞ്ഞ ഇടവേള ബാബു, അമ്മയിലെ ആളുകള്‍ക്ക് രാഷ്ട്രീയം വന്നപ്പോഴാണ് സംഘടനയ്ക്ക് കാല്‍ ഇടറിയതെന്നും, മുമ്പ് ആര്‍ക്കും രാഷ്ട്രീയമില്ലായിരുന്നുവെന്നും കൂട്ടിചേർത്തു.
“പുതിയ ആളുകള്‍ വരേണ്ട സമയമായി. ഒരു ട്രാന്‍സ്‌പോര്‍ട്ട് വണ്ടി രാവിലെ ഗാരേജില്‍ നിന്ന് പോകുന്നത് പോലെയാണ് ഇപ്പോള്‍. രാവിലെ വണ്ടി സ്റ്റാര്‍ട്ടാക്കും പോകും. അതില്‍ ഓയില്‍ ഒഴിക്കില്ല, അത് കഴുകില്ല. ഇങ്ങനെ പോയി കൊണ്ടിരിക്കുകയെയുള്ളൂ.
അതിന് മാറ്റം വേണമെങ്കില്‍ ഞാന്‍ മാറണം. അപ്പോള്‍ സ്വാഭാവികമായും പുതിയ ചിന്തകള്‍ വരും. ഒരുപാട് അധികാരങ്ങളുള്ള ആളാണ് ജനറല്‍ സെക്രട്ടറി. അത് മിസ് യൂസ് ചെയ്യാത്ത ആളാകണം അടുത്തതായി വേണ്ടതെന്ന് എനിക്ക് ആഗ്രഹമുണ്ട്. അതുപോലെ തന്നെയേ സംഭവിക്കുകയുള്ളു.
ഞാന്‍ ഇല്ലെങ്കില്‍ ലാലേട്ടന്‍ പിന്മാറുമെന്ന തീരുമാനത്തിലായിരുന്നു ആദ്യം നിന്നത്. അദ്ദേഹത്തോട് കാര്യങ്ങളൊക്കെ പറഞ്ഞിട്ടുണ്ട്. അമ്മയിലെ ആളുകള്‍ക്ക് രാഷ്ട്രീയം വന്നപ്പോഴാണ് സംഘടനയ്ക്ക് കാല്‍ ഇടറിയത്. മുമ്പ് ആര്‍ക്കും രാഷ്ട്രീയമില്ലായിരുന്നു.
ഉണ്ടെങ്കില്‍ തന്നെ പൊതുജനങ്ങള്‍ക്ക് ആ രാഷ്ട്രീയം അറിയില്ലായിരുന്നു. ഇപ്പോള്‍ എല്ലാവര്‍ക്കും ഓരോ രാഷ്ട്രീയ പാര്‍ട്ടികളില്‍ സ്വാധീനമുണ്ടായി. അവര്‍ ആ പാര്‍ട്ടിയുടെ ആളാണെന്ന തോന്നല്‍ മറ്റുള്ളവര്‍ക്കും വന്നു. അവിടം മുതലാണ് അമ്മക്ക് നേരെയുള്ള വിമര്‍ശനങ്ങള്‍ക്ക് ശക്തികൂടുന്നത്.” എന്നാണ് മനോരമയ്ക്ക് നൽകിയ അഭിമുഖത്തിൽ ഇടവേള ബാബു പറയുന്നത്.