മമ്മൂട്ടി- സന്തോഷ് വിശ്വനാഥ് കൂട്ടുകെട്ടിലൊരുങ്ങുന്ന “വണ്‍” മാര്‍ച്ച് 26ന് റിലീസിന് ഒരുങ്ങുകയാണ്. ചിത്രത്തില്‍ മമ്മൂട്ടിക്കൊപ്പം അഭിനയിച്ചതിനെ കുറിച്ച് പറഞ്ഞ് നടി ഗായത്രി അരുണ്‍. ഓരോ ആര്‍ട്ടിസ്റ്റിന്റെയും വളരെ സൂഷ്മമായ എല്ലാ ഭാവങ്ങളും ശ്രദ്ധിച്ച് മമ്മൂട്ടി ഉപദേശങ്ങള്‍ നല്‍കാറുണ്ട് എന്നാണ് ഗായത്രി ഒരു ഓണ്‍ലൈന്‍ ചാനലിന് നല്‍കിയ അഭിമുഖത്തില്‍ പറയുന്നത്.
ഒരു സീനില്‍ മാത്രമേ മമ്മൂക്കയും താനും ഒന്നിച്ച് അഭിനയിച്ചിട്ടുള്ളു. തന്റെ സജഷന്‍ ഷോട്ടില്‍ മമ്മൂക്കയുടെ സീന്‍ എടുത്തു കൊണ്ടിരിക്കുകയാണ്. ഒരു പൊലീസ് സ്റ്റേഷന്‍ സീനായിരുന്നു. തന്നെ സ്റ്റേഷനിലേക്ക് കൊണ്ടു വരികയാണ്. തന്റെ കൈ ഇങ്ങനെ വെറുതെ ഇട്ടിരിക്കുകയായിരുന്നു. മമ്മൂക്ക വന്ന് പൊലീസ് ഓഫീസറായി അഭിനയിക്കുന്ന ലേഡിക്ക് എന്തൊക്കെയോ നിര്‍ദേശങ്ങള്‍ കൊടുക്കുന്നുണ്ടായിരുന്നു.
തന്റെ അടുത്ത് വന്ന് പറഞ്ഞു കൈ കെട്ടി വെച്ചാല്‍ നന്നായിരിക്കുമെന്ന്. കഴിഞ്ഞ ഷോട്ടില്‍ ഇങ്ങനെയായിരുന്നു, കണ്ടിന്യൂയിറ്റിയ്ക്ക് വേണ്ടി ആണെന്ന് പറഞ്ഞു. “”എന്ത് കണ്ടിന്യൂയിറ്റി.., അതൊന്നുമില്ല. അടുത്ത ഷോട്ടില്‍ ഇങ്ങനെയാക്കിക്കോ”” എന്ന് മമ്മൂക്ക പറഞ്ഞു. അടുത്ത ഷോട്ട് എടുത്തപ്പോള്‍ അദ്ദേഹം പറഞ്ഞതു പോലെ ചെയ്തു. ഇപ്പോള്‍ കറക്ടായി എന്ന് മമ്മൂക്ക പറഞ്ഞു എന്നാണ് ഗായത്രി പറയുന്നത്.
രാഷ്ട്രീയവും പ്രതിസന്ധിയും അടിച്ചൊതുക്കലുമൊക്കെ പ്രമേയമാകുന്നു ചിത്രമാകും വണ്‍ എന്നാണ് നേരത്തെ എത്തെിയ ട്രെയിലര്‍ വ്യക്തമാക്കുന്നത്. ഗാനഗന്ധര്‍വ്വന് ശേഷം വീണ്ടും മമ്മുക്കയെ നായകനാക്കി ഇച്ചായിസ് പ്രൊഡക്ഷന്‍സ് നിര്‍മ്മിക്കുന്ന ചിത്രത്തിന്റെ പ്രൊഡ്യൂസര്‍ ശ്രീലക്ഷ്മി ആര്‍ ആണ്.