അടുത്ത കാലത്തായി സിനിമകള്‍ തിരഞ്ഞെടുപ്പിന്റെ പേരില്‍ ഒരുപാട് വിമര്‍ശിക്കപ്പെട്ട താരമാണ് മോഹന്‍ലാല്‍. താരത്തിന്റെ മോണ്‍സ്റ്റര്‍, ആറാട്ട് എന്നീ സിനിമകള്‍ എല്ലാം തിയേറ്ററില്‍ അടപടലം പൊട്ടിയിരുന്നു. അതുകൊണ്ട് താരത്തിന്റെ ഒരു സൂപ്പര്‍ ഹിറ്റ് സിനിമയ്ക്കായാണ് സിനിമാപ്രേമികള്‍ കാത്തിരിക്കുന്നത്.
അടുത്ത വര്‍ഷം അത് സംഭവിക്കും എന്ന പ്രതീക്ഷയിലുമാണ് മലയാളികള്‍. ലിജോ ജോസ് പെല്ലിശേരി-മോഹന്‍ലാല്‍ കോമ്പോ നല്‍കുന്ന ഹൈപ്പ് അതാണ്. ഇപ്പോഴിതാ, വാലിബനായി മോഹന്‍ലാലിനെ ആദ്യമായി കണ്ടപ്പോള്‍ താന്‍ ഞെട്ടിപ്പോയതിനെ കുറിച്ച് പറയുകയാണ് നടന്‍ ഹരീഷ് പേരടി. വാലിബനില്‍ പ്രധാന കഥാപാത്രമായാണ് ഹരീഷ് പേരടി എത്താന്‍ പോകുന്നത്.
ഹരീഷ് പേരടിയുടെ കുറിപ്പ്:
വാലിഭന്റെ പൂജക്ക് ലാലേട്ടന്‍ രാജസ്ഥാനില്‍ എത്തിയ ദിവസം ഞങ്ങള്‍ വിശേഷങ്ങള്‍ കൈമാറി പിരിഞ്ഞു… അതിന്റെ അടുത്ത ദിവസം രാജസ്ഥാനിലെ ഒരു കാള വണ്ടിയുടെ പിന്നില്‍ മൂപ്പര് വാലിഭനായി കാലും തൂക്കിയിട്ട് ഇരിക്കുന്നുണ്ടായിരുന്നു… സത്യത്തില്‍ തലയും താഴ്ത്തി എന്റെ കാപാത്രത്തെ മാത്രം ചിന്തിച്ച് നടന്ന ഞാന്‍ ആദ്യം മൂപ്പരെ കണ്ടില്ല… തെട്ടടുത്ത് എത്തി കുറച്ച് നേരം കഴിഞ്ഞ് തല പൊന്തിച്ചപ്പോളാണ് ഞാന്‍ മൂപ്പരെ വാലിഭനായി ആദ്യം കാണുന്നത്…
സ്‌ക്രിപ്റ്റ് മുഴുവന്‍ വായിച്ച് പഠിച്ച ഞാന്‍ വാ പൊളിച്ച് ഒരു സെക്കന്‍ഡിന്റെ ഗ്യാപ്പ് ഇല്ലാതെ പറഞ്ഞു ‘ലാലേട്ടാ ഇത് പൊളിച്ചു’ എന്ന്.. (ഫസ്റ്റ്‌ലുക്ക് പോസ്റ്റര്‍ കണ്ട എല്ലാ മനുഷ്യര്‍ക്കുമുണ്ടായ വികാരം).. അപ്പോള്‍ മൂപ്പര് ‘എന്നോട് I Love Uന്ന് പറ’ എന്ന് പറഞ്ഞതിനു ശേഷം ചിരിക്കുന്ന വന്ദനത്തിലെ ആ ചിരി ചിരിച്ച് എന്നോട് ചോദിച്ചു ‘ഹരീഷ് സ്‌ക്രിപ്റ്റ് മുഴുവന്‍ വായിച്ചില്ലേയെന്ന്’.
വായിച്ചു എന്ന് തലകുലുക്കി ശരീരഭാഷയിലൂടെ പറഞ്ഞ ഞാന്‍ ഒറ്റക്ക് മാറി നിന്ന് എന്റെ മനസ്സിനോട് ഉറക്കെ പറഞ്ഞു എന്റെ സ്വപനങ്ങളെ കൂടുതല്‍ ഭംഗിയാക്കുന്നവരെ ഞാന്‍ കൂടെ കൂട്ടുമെന്ന്…. കാലവും ദൈവവും ഈ മനുഷ്യനെ ഏല്‍പ്പിക്കുന്ന ദൗത്യങ്ങള്‍ ഒരു നടന്‍ എന്ന നിലയില്‍ വലിയ പ്രചോദനമാണ് എന്നില്‍ ഉണ്ടാക്കിയത്.. എഴുതാത്ത എന്റെ ആത്മകഥയിലെ നിറമുള്ള ഏടുകള്‍… ലാല്‍ സലാം ലാലേട്ടാ..