നന്ദമൂരി ബാലകൃഷ്ണയുടെ ‘വീരസിംഹ റെഡ്ഡി’ എന്ന ചിത്രം ഗംഭീര വിജയം നേടിയിരിക്കുകയാണ്. ഹണി റോസ് ആണ് ചിത്രത്തില്‍ നായികയായി എത്തിയത്. ഹണി ബാലയ്യയെ കുറിച്ച് പറഞ്ഞ വാക്കുകളാണ് ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്. സപ്പോര്‍ട്ടീവ് ആയ, കളങ്കമില്ലാത്ത ഒരാളാണ് ബാലയ്യ എന്നാണ് ഹണി പറയുന്നത്.
ഇവിടുത്തെ ട്രോളുകളും മറ്റും കണ്ടാണ് ബാലയ്യയെ കുറിച്ച് തനിക്ക് അറിയാവുന്നത്. ഒപ്പം വര്‍ക്ക് ചെയ്യുന്നതിന് മുമ്പ് അദ്ദേഹത്തിന്റെ സിനിമകളൊക്കെ താന്‍ കണ്ടിട്ടുണ്ട്. ‘അഖണ്ഡ’ തനിക്ക് ഒത്തിരി ഇഷ്ടമുള്ള സിനിമയാണ്. അദ്ദേഹത്തെ കുറിച്ച് അന്വേഷിക്കുമ്പോഴോക്കെ പല പല കഥകളാണ് നമ്മള്‍ കേള്‍ക്കുന്നത്.
ദേഷ്യമുള്ള ആളാണ് എന്നൊക്കെ. പക്ഷേ ആദ്യ ദിവസം തന്നെ നമ്മളൊന്നും കേട്ടറിഞ്ഞ ആളല്ല ബാലയ്യ എന്ന തിരിച്ചറിവാണ് തനിക്ക് ഉണ്ടായത്. ഭയങ്കര എനര്‍ജിയില്‍ എപ്പോഴും സംസാരിക്കുന്ന ആളാണ് അദ്ദേഹം. ബാലയ്യയുടെ സിനിമകള്‍ മാസ് മൂവി, പവര്‍ സിനിമകള്‍ എന്നാണ് പറയാറുള്ളത്.
അതേ പവറാണ് അദ്ദേഹത്തിന്റെ ലൈഫിലും. ഇവര്‍ ഇത്രയും ആക്ടീവ് ആയിട്ട് ഇരിക്കുന്നത് എങ്ങനെ എന്നത് ഭയങ്കര അതിശയമാണ്. അതിന്റെ ഒരു അംശം പോലും എനര്‍ജി നമുക്കൊന്നും ഇല്ല. സപ്പോര്‍ട്ടീവ് ആയിട്ടുള്ള ആളാണ് അദ്ദേഹം. കളങ്കമില്ലാത്ത വ്യക്തിയാണ് എന്നാണ് ഹണി റോസ് ഒരു യൂട്യൂബ് ചാനലിന് നല്‍കിയ അഭിമുഖത്തില്‍ പറയുന്നത്.
വീരസിംഹ റെഡ്ഡിക്ക് ശേഷം അടുത്ത ബാലകൃഷ്ണ ചിത്രത്തിലും ഹണി റോസ് തന്നെയാകും നായിക എന്നാണ് റിപ്പോര്‍ട്ടുകള്‍. എന്നാല്‍ ഇതിനെ കുറിച്ച് തനിക്ക് ഒരു അറിയിപ്പും ലഭിച്ചിട്ടില്ലെന്ന് ഹണി പറഞ്ഞിരുന്നു. ബാലകൃഷ്ണയുടെ ഭാഗ്യനായിക ആയാണ് തെലുങ്ക് പ്രേക്ഷകര്‍ ഇപ്പോള്‍ ഹണിയെ കുറിച്ച് പറയുന്നത്.