താന്‍ ഡേറ്റിംഗില്‍ ആണെന്ന് വെളിപ്പെടുത്തി നടി മംമ്ത മോഹന്‍ദാസ്. പലപ്പോഴായി വിവാഹ ഗോസിപ്പുകള്‍ നടിയുടെ പേരില്‍ വന്നിട്ടുണ്ടെങ്കിലും ഒന്നിനും തന്നെ താരം ഇതുവരെ പ്രതികരിച്ചിരുന്നില്ല. ഹിന്ദുസ്ഥാന്‍ ടൈംസിന് നല്‍കിയ അഭിമുഖത്തിലാണ് മംമ്ത ഇപ്പോള്‍ മനസു തുറന്നിരിക്കുന്നത്.
”ലോസ് ഏഞ്ചല്‍സില്‍ ഉള്ള ഒരു വ്യക്തിയുമായി ഒരു പ്രണയം ഉണ്ടായിരുന്നു. പക്ഷേ ലോങ്ങ് ഡിസ്റ്റന്‍സ് ആയതിനാല്‍ ആ പ്രണയം നീണ്ടു നിന്നില്ല. എനിക്ക് പ്രണയത്തില്‍ കരുതല്‍ ഉണ്ടെങ്കിലും അത് വളരെ മനസിലാക്കി പോകേണ്ട ഒന്നായിരിക്കണം. ഒരു ബുദ്ധിമുട്ട് ഉണ്ടാകരുത്.
”ഒരാള്‍ക്ക് ഒന്നും രണ്ടും മൂന്നും തവണ അവസരം നല്‍കും. അതില്‍ കൂടുതല്‍ എനിക്ക് സഹിക്കാനാവില്ല. ഇപ്പോള്‍ ഞാന്‍ ഒരാളുമായി ഡേറ്റിംഗ് ആണ്. ഇതില്‍ ഞാന്‍ സന്തോഷവതിയാണ്. ഭാവിയില്‍ എന്താകുമെന്ന് അറിയില്ല, ഇപ്പോള്‍ സന്തോഷമാണ്” എന്നാണ് മംമ്ത പറയുന്നത്.
അതേസമയം, ‘മഹാരാജ’ എന്ന തമിഴ് ചിത്രമാണ് മംമ്തയുടെതായി റിലീസിന് ഒരുങ്ങുന്നത്. വിജയ് സേതുപതി നായകനാകുന്ന ചിത്രമാണ് മഹാരാജ. ബാര്‍ബര്‍ ഷോപ്പുടമയായാണ് ചിത്രത്തില്‍ വിജയ് എത്തുന്നത്. അനുരാഗ് കശ്യപ് ആണ് വില്ലനായെത്തുക. നട്ടി നടരാജ്, ഭാരതിരാജ, മുനിഷ്‌കാന്ത്, അഭിരാമി, മണികണ്ഠന്‍ തുടങ്ങിയവരും ചിത്രത്തില്‍ പ്രധാന വേഷത്തിലെത്തുന്നുണ്ട്.
ഈ മാസം 14ന് ആണ് ചിത്രം റിലീസ് ചെയ്യുന്നത്. ‘ബാന്ദ്ര’ ആണ് താരത്തിന്റെതായി ഒടുവില്‍ പുറത്തിറങ്ങിയ ചിത്രം. ദിലീപ് നായകനായ ചിത്രം തിയേറ്ററില്‍ ഫ്‌ളോപ്പ് ആയിരുന്നു. മലയാളം, തെലുങ്ക്, തമിഴ് ഭാഷകളിലും അഭിനയ രംഗത്ത് സജീവമായ താരം പിന്നണി ഗായിക കൂടിയാണ്.