2022ല്‍ റിലീസായ തെലുങ്ക് ചിത്രം ‘അന്‍ടേ സുന്ദരാനികി’ തിയേറ്ററില്‍ വേണ്ടത്ര വിജയമാകാത്തതിനോട് പ്രതികരിച്ച് നടി നസ്രിയ. വിവേക് ആത്രേയ സംവിധാനം ചെയ്ത ചിത്രത്തില്‍ നാനിയായിരുന്നു നായകന്‍. ‘ആഹാ സുന്ദര’ എന്ന പേരില്‍ ചിത്രം മലയാളത്തിലും ഡബ്ബ് ചെയ്ത് പുറത്തിറങ്ങിയിരുന്നു.
‘മികച്ചൊരു സിനിമയായിരിക്കും എന്ന് കരുതിത്തന്നെയാണ് അന്‍ടേ സുന്ദരാനികി ചെയ്തത്. പക്ഷേ, തിയേറ്ററില്‍ ഉദ്ദേശിച്ച രീതിയില്‍ ആ പടം വര്‍ക്കായില്ല. ഒടിടി റിലീസിന് ശേഷം പലരും ആ സിനിമയെ പ്രശംസിച്ച് മെസ്സേജയച്ചു.’
‘തിയേറ്ററില്‍ ആ സിനിമ സ്വീകരിക്കപ്പെടാത്തതില്‍ ഞാന്‍ ഓഡിയന്‍സിനെ കുറ്റം പറയില്ല. കാരണം ഒടിടിയില്‍ കണ്ടപ്പോള്‍ അവര്‍ നല്ല അഭിപ്രായമാണ് പറഞ്ഞത്. ഇന്നും പലരും ആ സിനിമയെപ്പറ്റിയും എന്റെ ക്യാരക്ടറിനെപ്പറ്റിയും സംസാരിക്കാറുണ്ട്.’
‘എന്റെ ഏത് സിനിമ റിലീസായാലും ആദ്യത്തെ വെള്ളിയാഴ്ച മാത്രമേ ഞാന്‍ അതിനെപ്പറ്റി ചിന്തിച്ച് ബോതേര്‍ഡ് ആകാറുള്ളൂ. പ്രേക്ഷകര്‍ക്ക് ഇഷ്ടമായെന്നറിഞ്ഞാല്‍ സന്തോഷം തോന്നും. അതേസമയം അത് പ്രതീക്ഷിച്ച രീതിയില്‍ വര്‍ക്കായില്ല എന്നറിഞ്ഞാല്‍ പിന്നെ അതിനെപ്പറ്റി അധികം ചിന്തിക്കാന്‍ നില്‍ക്കാറില്ല. സോഷ്യല്‍ മീഡിയ നോക്കും, അല്ലെങ്കില്‍ വേറെ എന്തെങ്കിലുമൊക്കെ ചെയ്യും.’ നസ്രിയ പറഞ്ഞു. ഹോളിവുഡ് റിപ്പോര്‍ട്ടര്‍ ഇന്ത്യയ്ക്ക് നല്‍കിയ അഭിമുഖത്തിലാണ് നടിയുടെ പ്രതികരണം.