90കളില്‍ തെന്നിന്ത്യയിലെ സൂപ്പര്‍ നായികയായിരുന്നു രംഭ. തമിഴ് സിനിമയില്‍ ഏറെ സജീവമായിരുന്ന താരം വിവാഹത്തോടെയാണ് അഭിനയത്തില്‍ നിന്നും ഇടവേള എടുത്തത്. കുടുംബത്തോടൊപ്പം കാനഡയില്‍ സ്ഥിരതാമസമാക്കിയിരിക്കുകയാണ് രംഭ ഇപ്പോള്‍.
രംഭയുടെ അഭിമുഖത്തില്‍ നിന്നുള്ള ഒരു വീഡിയോയാണ് ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്. താന്‍ ഭര്‍ത്താവിനെ ഇന്‍സ്റ്റഗ്രാമില്‍ ഫോളോ ചെയ്യാറില്ല എന്നാണ് രംഭ ഒരു അഭിമുഖത്തില്‍ പറഞ്ഞിരിക്കുന്നത്. അതിന് പിന്നിലെ കാരണം നടി തമന്നയാണെന്നും വെളിപ്പെടുത്തിയിരിക്കുകയാണ് നടി ഇപ്പോള്‍.
”ഞാന്‍ അദ്ദേഹത്തെ ഇന്‍സ്റ്റയില്‍ ഫോളോ ചെയ്യാറില്ല. അതിനൊരു കാരണമുണ്ട്. അദ്ദേഹം ഇന്‍സ്റ്റ തുടങ്ങിയപ്പോള്‍ ഞാന്‍ പറഞ്ഞു ആദ്യം എന്നെ ഫോളോ ചെയ്യണം എന്ന്. പക്ഷേ പുള്ളി പറഞ്ഞു അത് പറ്റില്ല ഞാന്‍ തമന്നയെ ഫോളോ ചെയ്യും എന്ന്.”
”എന്നിട്ട് ആദ്യം തമന്നയെ ഫോളോ ചെയ്തു. അപ്പോള്‍ ഞാന്‍ പറഞ്ഞു എന്നാല്‍ നിങ്ങളെ ഞാനും ഫോളോ ചെയ്യില്ല. നിങ്ങള്‍ക്ക് എന്റെ ഇന്‍സ്റ്റയില്‍ നോക്കിയാല്‍ അറിയാം, ഞാന്‍ പുള്ളിയെ ഫോളോ ചെയ്യുന്നില്ല” എന്നാണ് രംഭ പറയുന്നത്. ഈ അഭിമുഖത്തിന്റെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്.
‘ആ ഒക്കട്ടി അടക്കു’ എന്ന തെലുങ്ക് ചിത്രത്തിലൂടെ അഭിനയരംഗത്ത് എത്തിയ രംഭ തമിഴ്, തെലുങ്ക്, ഹിന്ദി, കന്നഡ, മലയാളം ചിത്രങ്ങളില്‍ സജീവമായിരുന്നു. ബംഗാളി, ഭോജ്പുരി, ഇംഗ്ലീഷ് ചിത്രങ്ങളിലും രംഭ അഭിനയിച്ചിട്ടുണ്ട്. 2017 വരെ ടെലിവിഷന്‍ ഷോകളില്‍ ജഡ്ജായും താരം എത്തിയിരുന്നു.