മഹേഷ് ബാബു പ്രധാന വേഷത്തിലെത്തിയ ഗുണ്ടൂർ കാരത്തെക്കുറിച്ച് നടൻ ജഗപതി ബാബു പറഞ്ഞ വാക്കുകളാണ് ഇപ്പോൾ വൈറലാകുന്നത്. ചിത്രത്തിലെ മാർക്സ് എന്ന വില്ലന്‍ വേഷമാണ് ജഗപതി ബാബു അവതരിപ്പിച്ചത്. സിനിമയിലെ തന്‍റെ രംഗങ്ങള്‍ വെറും വേസ്റ്റാണ് എന്നാണ് താരം പ്രതികരിച്ചത്. ടൈംസ് നൗവിന് നല്‍കിയ അഭിമുഖത്തിലാണ് ജഗപതി ബാബു ഇക്കാര്യം പറഞ്ഞത്.
ചിത്രത്തിൽ മഹേഷ് ബാബുവിന്റെ അച്ഛനായി അഭിനയിച്ച ജയറാമിനെതിരെ പ്രവർത്തിക്കുന്ന മാർക്സ് ബാബു എന്ന വില്ലനായാണ് ജഗപതി അവതരിപ്പിച്ചത്. വെങ്കട് രമണ എന്ന മഹേഷിന്റെ കഥാപാത്രവുമായി ഒരു കോമ്പിനേഷന്‍ രംഗവും താരത്തിനുണ്ടായിരുന്നു.
‘വളരെ വ്യത്യസ്തമായിരിക്കും ആ രംഗം എന്നാണ് കരുതിയത്. എന്നാല്‍ അതിന് കുറച്ചുകൂടി ഉള്ളടക്കം ആവശ്യമുണ്ടായിരുന്നു. എന്നാല്‍ അത് ചിത്രീകരിക്കാന്‍ തുടങ്ങിയപ്പോള്‍ തന്നെ കാര്യം കൈവിട്ടുവെന്ന് മനസിലായി. എനിക്ക് ചെയ്യാന്‍ പറ്റുന്ന പരമാവധി ഞാന്‍ ചെയ്തു. ഞാനും മഹേഷും ഉള്‍പ്പെടുന്ന ഒരു സീന്‍ ഒരിക്കലും ഇങ്ങനെ വേസ്റ്റ് ചെയ്യരുത്. അതൊരിക്കലും പാഴാക്കാതെ ചിത്രീകരിക്കണം. അത് മികച്ചതാക്കണം’. എന്നാണ് ജഗപതി പറഞ്ഞത്.
ത്രിവിക്രം ശ്രീനിവാസ് സംവിധാനം ചെയ്ത് ഗുണ്ടൂർ കാരം ജനുവരിയിലാണ് പുറത്തിറങ്ങിയത്. എന്നാൽ ചിത്രം ബോക്സോഫീസില്‍ വലിയ പ്രകടനമൊന്നും കാഴ്ച വച്ചിരുന്നില്ല.
