‘പൊന്നിയിന്‍ സെല്‍വന്‍’ ചിത്രത്തില്‍ അഭിനയിച്ചതിനെ കുറിച്ച് പറഞ്ഞ് നടന്‍ ജയറാം. വന്‍താരനിര അണിചേരുന്ന ചിത്രത്തില്‍ ‘ആള്‍വാര്‍കടിയാന്‍ നമ്പി’ എന്ന കഥാപാത്രത്തെയാണ് ജയറാം അവതരിപ്പിക്കുന്നത്. സിനിമയ്ക്കായി സിക്‌സ് പാക്കില്‍ നിന്നും മാറി കുടവയര്‍ ഉണ്ടാക്കിയതിനെ കുറിച്ച് തുറന്നു പറഞ്ഞിരിക്കുകയാണ് ജയറാം.
‘അല വൈകുണ്ഠപുരം ലോ’ എന്ന ചിത്രത്തില്‍ അല്ലു അര്‍ജുന്റെ അച്ഛനായി അഭിനയിക്കുന്ന അവസരത്തില്‍ സിക്‌സ് പാക്കൊക്കെ ആക്കാനുള്ള ശ്രമത്തിലായിരുന്നു. ഇതിനെ കുറിച്ച് അല്ലു അര്‍ജുനോട് പറയുകയും ചെയ്തിരുന്നു. മൂന്ന് മാസമുണ്ടായിരുന്നു ഷൂട്ടിംഗ്. അപ്പോഴേക്കും ഭാരമൊക്കെ കുറഞ്ഞിരുന്നു.
അങ്ങനെയിരിക്കെയാണ് മണി സാര്‍ വിളിച്ചിട്ട് കഥാപാത്രത്തെ കുറിച്ച് പറഞ്ഞത്. രണ്ടു വര്‍ഷത്തേക്ക് കുടുമി മാത്രമേ തലയിലുണ്ടാവൂ, വയര്‍ ഉണ്ടാക്കണം എന്നു പറഞ്ഞു. ഇപ്പോഴാണ് ഇങ്ങനെയൊരു ശരീരം ഉണ്ടാക്കി എടുത്തത്. പക്ഷേ, ഇതുപോലൊരു കഥാപാത്രം ഇനി കിട്ടില്ലല്ലോ. നന്നായി ഭക്ഷണം കഴിക്കാന്‍ തുടങ്ങി.
തനിക്ക് മാത്രമായി സെറ്റില്‍ ഭക്ഷണമുണ്ടായിരുന്നു. ഇന്റര്‍വ്യൂവില്‍ പറയാന്‍ പാടില്ലാത്തതാണ്. തായ്‌ലാന്‍ഡില്‍ ഷൂട്ടിംഗ് നടക്കുമ്പോള്‍ തനിക്ക് മാത്രമായി റൂമിലേക്ക് ബിയര്‍ കൊടുത്തു വിടും. ഷൂട്ടിംഗ് കഴിയുന്നതു വരെ തന്റെ മുഖത്ത് നോക്കാതെ വയറിലേക്കാണ് അദ്ദേഹം നോക്കിക്കൊണ്ടിരുന്നത് എന്നാണ് ജയറാം പറയുന്നത്.