ജയറാമിന്റെ തിരിച്ചുവരവിനൊപ്പം ‘എബ്രഹാം ഓസ്‌ലര്‍’ ചിത്രത്തിലെ മെഗാസ്റ്റാറിന്റെ മെഗാ എന്‍ട്രിയും തിയേറ്ററില്‍ ആഘോഷിക്കപ്പെടുകയാണ്. ചിത്രത്തിലെ മമ്മൂട്ടിയുടെ കാമിയോ റോളിന് ഗംഭീര പ്രതികരണങ്ങളാണ് ലഭിച്ചു കൊണ്ടിരിക്കുന്നത്. ഓസ്‌ലര്‍ റിലീസ് ദിനത്തില്‍ ദളപതി വിജയ് ആവേശത്തോടെ തന്നോട് പറഞ്ഞ കാര്യങ്ങളാണ് ജയറാം ഇപ്പോള്‍ തുറന്നു പറഞ്ഞിരിക്കുന്നത്.
മമ്മൂട്ടി ചിത്രത്തിലുണ്ടോ എന്ന് ചോദിച്ച് എത്തിയ വിജയ് പറഞ്ഞ കാര്യങ്ങളെ കുറിച്ചാണ് ജയറാം പറയുന്നത്. ”ഇന്നലെ മദ്രാസില്‍ വിജയ്‌യുടെ കൂടെയുള്ള സിനിമ ഷൂട്ടിംഗ് നടക്കുകയായിരുന്നു. പടം ഇറങ്ങിയപ്പോള്‍ വിജയ് ഓടി വന്ന് എന്നോട് ചോദിച്ചു, ‘ഇതില്‍ മമ്മൂട്ടി സാര്‍ ഇരിക്കാറാ?”
”അപ്പടിയാ അങ്ങനെയാണെങ്കില്‍ എനിക്ക് ഉടനെ സിനിമ കാണണം’ എന്ന്. എന്താ മൂപ്പര് ചെയ്തിട്ടുള്ളത് എന്ന് കാണാന്‍ വേണ്ടിട്ട് അത്ര വ്യത്യസ്തമായിട്ട് ഓരോ പടങ്ങളും ചെയ്തിട്ടുള്ളത്. എന്തെങ്കിലും കാരണമുണ്ടാകും ആ പടം ചെയ്യാന്‍ അത് എന്താണെന്ന് എനിക്ക് അറിയണം എന്നാണ് വിജയ് പറഞ്ഞത്. പുള്ളിക്ക് പടം കാണാന്‍ ഏര്‍പ്പാടുക്കിയിട്ടുണ്ട്” എന്നാണ് ജയറാം പറയുന്നത്.
ചിത്രത്തിന്റെ ഭാഗമായി സംഘടിപ്പിച്ച പ്രസ്മീറ്റിലാണ് ജയറാം സംസാരിച്ചത്. മമ്മൂട്ടിയും ചിത്രത്തിലെ മറ്റ് അണിയറപ്രവര്‍ത്തകരും പ്രസ്മീറ്റില്‍ അണിനിരന്നിരുന്നു. മിഥുന്‍ മാനുവല്‍ തോമസിന്റെ സംവിധാനത്തില്‍ ഒരുങ്ങിയ ചിത്രത്തിന്റെ കൂടുതല്‍ ഷോകള്‍ കേരളത്തില്‍ ആരംഭിച്ചിട്ടുണ്ട്.
3 കോടിക്ക് അടുത്താണ് ചിത്രത്തിന് ലഭിച്ചിരിക്കുന്ന ഓപ്പണിംഗ് കളക്ഷന്‍. അതേസമയം, നിലവില്‍ വെങ്കട് പ്രഭുവിന്റെ സംവിധാനത്തില്‍ ഒരുങ്ങുന്ന ‘ദ ഗോട്ട്’ എന്ന ചിത്രത്തിലാണ് ജയറാം അഭിനയിച്ചു കൊണ്ടിരിക്കുന്നത്. വിജയ്‌ക്കൊപ്പം പ്രധാന വേഷത്തിലാണ് ജയറാം എത്തുന്നത്.