സമൂഹിക വിഷയങ്ങളില്‍ തന്റേതായ നിലപാടെടുക്കുകയും അഭിപ്രായം പറയുകയും ചെയ്യുന്ന അദ്ദേഹം സമൂഹ മാധ്യമങ്ങളിലും ശ്രദ്ധേയ സാന്നിദ്ധ്യമാണ്. രാഹുല്‍ ഗാന്ധി പങ്കെടുത്ത സത്യമേവ ജയതേ വേദിയില്‍ ജോയ് മാത്യു പറഞ്ഞ കാര്യങ്ങള്‍ വീണ്ടും ശ്രദ്ധ നേടുകയാണ്.
മലയാള സിനിമയിലെ സൂപ്പര്‍ സ്റ്റാറുകള്‍ അനീതിക്കെതിരെ ശബ്ദിക്കില്ലെന്ന് പറഞ്ഞ അദ്ദേഹം, ആര്‍ജ്ജവമുള്ള താനാണ് യഥാര്‍ത്ഥ സൂപ്പര്‍ സ്റ്റാര്‍ എന്നും പറയുന്നു.
ജോയ് മാത്യുവിന്റെ വാക്കുകള്‍
ഞാന്‍ കോണ്‍ഗ്രസുകാരന്‍ ആണോ എന്ന് ചോദിച്ചാല്‍ എനിക്ക് തന്നെ അതറിയില്ല. ഇപ്പോള്‍ ഇന്ന് മുതലോ നാളെ മുതലോ എന്റെ പേര് വച്ച് ഫേസ്ബുക്കില്‍ ട്രോളുകള്‍ വരാന്‍ തുടങ്ങും. അങ്ങനെയുള്ള കാര്യങ്ങളൊന്നും മുഖവിലയ്ക്ക് എടുക്കാത്ത ആളാണ് ഞാന്‍. ഞാനൊരു കലാകാരനാണ്, ഒരു നടനാണ്. ജനങ്ങള്‍ക്ക് ഇഷ്ടമുള്ള നടനാണെന്നാണ് ഞാന്‍ വിശ്വസിക്കുന്നത്. ഞാനപ്പോള്‍ പൊതുസ്വത്താണ്.
എന്റെ സിനിമ കോണ്‍ഗ്രസുകാര്‍ മാത്രം കാണണം, കമ്യൂണിസ്റ്റുകാര്‍ കാണേണ്ട, എന്നൊന്നും എനിക്ക് പറയാന്‍ പറ്റില്ല.
കാരണം ഞാന്‍ ജനങ്ങളുടെ സ്വത്താണ്. ഞാന്‍ അഭിനയിക്കുന്ന സിനിമകള്‍ കാണുന്നതും എന്റെ എഴുത്ത് വായിക്കുന്നതും ജനങ്ങളാണ്. അതില്‍ വേര്‍തിരിവില്ല. ജാതി- വംശ വ്യത്യാസങ്ങളൊന്നും ഇല്ല. ഞാന്‍ അങ്ങനെ കാണുന്നുമില്ല. നെറികേടിനെ നെറികേടെന്ന് പറയാന്‍ കാണിക്കുന്ന ആര്‍ജ്ജവത്തെയാണ് ‘സൂപ്പര്‍ സ്റ്റാര്‍’ എന്ന് വിളിക്കുകയെങ്കില്‍, ഞാന്‍ സൂപ്പര്‍ സ്റ്റാറാണ്. നിങ്ങള്‍ക്ക് ഒരുപാട് സൂപ്പര്‍ സ്റ്റാറുകള്‍ ഉണ്ടാകും. പക്ഷേ സമൂഹത്തില്‍ നടക്കുന്ന എന്തെങ്കിലും ഒരു അനീതിക്കെതിരെ കമ എന്ന് മിണ്ടാന്‍ ധൈര്യമില്ലാത്തവരാണ്.