കേരള ലിറ്ററേച്ചർ ഫെസ്റ്റിവൽ വേദിയിൽ സംവിധായകൻ ജൂഡ് ആന്തണി ജോസഫും കാണികളും തമ്മിൽ വാക്കുതർക്കം. ജൂഡ് സംവിധാനം ചെയ്ത ‘2018 എവരിവൺ ഈസ് എ ഹീറോ’ എന്ന ചിത്രത്തിൽ മുഖ്യമന്ത്രി പിണറായി വിജയന്റെയും ഭരണകൂടത്തിന്റെയും പങ്ക് അവഗണിച്ചത് എന്തുകൊണ്ടാണ് എന്ന ചോദ്യത്തിനിടെയായിരുന്നു ജൂഡും കാണികളും തമ്മിൽ വാക്കുതർക്കത്തിലേർപ്പെട്ടത്.
കഴിഞ്ഞ ഒരു മണിക്കൂറിൽ താൻ ഈ ചോദ്യത്തിനുള്ള ഉത്തരം തന്നുവെന്നും പിന്നെയും ഇതുതന്നെ ആവർത്തിക്കുന്നത് വ്യക്തമായ ലക്ഷ്യങ്ങളോടെ ആണെന്നും ജൂഡ് പറയുന്നു.
“നിങ്ങളുടെ രാഷ്ട്രീയം എന്റെ മേലേക്ക് ഇടണ്ട. അത് കയ്യില്‍ വെച്ചാല്‍ മതി. ഇത്രയും നേരം സംസാരിച്ചതു മനസിലാകാഞ്ഞിട്ടല്ല. മുഖ്യമന്ത്രിയെ ഞാന്‍ അപമാനിച്ചിട്ടില്ല. കേരളത്തിന്‍റെ ഒരുമയെ ആണ് ആ ചിത്രത്തില്‍ കാണിച്ചത്. അതിനെ പറ്റി ഞാന്‍ സംസാരിച്ചതു മനസിലാകാത്തത് പോലെ നിങ്ങള്‍ അഭിനയിക്കുകയാണ്. ഒരു രാഷ്ട്രീയവും ഇല്ലാത്ത ആളാണ് ഞാന്‍. ഏത് ബ്രാഞ്ചിന്റെ സെക്രട്ടറിയാണ് നിങ്ങൾ? നിങ്ങളുടെ രാഷ്ട്രീയം എനിക്കു മനസിലായി. അതുകൊണ്ട് ഉത്തരം പറയാന്‍ എനിക്ക് സൗകര്യമില്ല.” എന്നാണ് ജൂഡ് ആന്തണി ജോസഫ് മറുപടി പറഞ്ഞത്.
അതേസമയം ചോദ്യം ചോദിക്കുമ്പോൾ പാർട്ടി മെമ്പർ ആണോ അല്ലയോ എന്ന് തിരിച്ചുചോദിക്കുന്നത് ശരിയല്ലെന്നും കാണികൾ പ്രതികരിച്ചു.
