1986 ൽ ഫാസിൽ സംവിധാനം ചെയ്ത ‘എന്നെന്നും കണ്ണേട്ടന്റെ’ എന്ന ചിത്രത്തിലൂടെ മലയാള സിനിമയിൽ ഗാന രചയിതാവായി അരങ്ങേറ്റം കുറിച്ച വ്യക്തിയാണ് കൈതപ്രം ദാമോദരൻ നമ്പൂതിരി. മലയാളികൾ എന്നും ഓർത്തിരിക്കുന്ന ഒരുപാട് മികച്ച ഗാനങ്ങൾ കൈതപ്രം രചിച്ചിട്ടുണ്ട്.
ഇപ്പോഴിതാ സംഗീത ജീവിതത്തെ പറ്റിയും സിനിമയുടെ ഭാഗമായി തനിക്കുണ്ടായ അനുഭവങ്ങളെ പറ്റിയും മനസുതുറക്കുകയാണ് കൈതപ്രം. കൂടാതെ മലയാള സിനിമയ്ക്ക് ഇപ്പോൾ നല്ല ഗാനങ്ങൾ തിരിച്ചറിയാൻ കഴിയുന്നില്ലെന്നും പൃഥ്വിരാജ് എന്ന നടനെ തനിക്ക് പേടിയില്ലെന്നും കൈതപ്രം പറയുന്നു.
“എന്നെ സംബന്ധിച്ചിടത്തോളം പൃഥ്വിരാജ് ആരുമല്ല. മലയാള സിനിമയുടെ കുത്തകാവകാശം പൃഥ്വിരാജിന് ആണെങ്കിൽ പോലും അയാളെ ഞാൻ ഭയപ്പെടുന്നില്ല. ഒരിക്കൽ ദേവരാജൻ മാഷ് എന്നോട് പറഞ്ഞു, ലോകത്തിലെ ഏറ്റവും മികച്ച ഗായകൻ യേശുദാസ് ആണെന്ന് അയാൾക്കും കൂടി അറിയാവുന്ന കാര്യമാണ്. അതുതന്നെയാണ് യേശുദാസിന്റെ പ്രധാന പ്രശ്നം എന്നായിരുന്നു. അതുപോലെ തന്നെ എന്റെ പൊട്ടൻഷ്യൽ എന്താണെന്ന് എനിക്ക് നല്ല ബോധ്യമുണ്ട്. അത് ഞാൻ നേടിയെടുത്തതാണ്.” ദി ന്യൂ ഇന്ത്യൻ എക്സ്പ്രസിന് നൽകിയ അഭിമുഖത്തിൽ കൈതപ്രം പറഞ്ഞു.
മുമ്പ് ദീപക് ദേവ് സംഗീത സംവിധാനം ചെയ്ത സിനിമയില്‍ പാട്ടെഴുതാനായി വിളിച്ചുവരുത്തിയ ശേഷം പൃഥ്വിരാജ് ഇടപെട്ട് ഒഴിവാക്കി തന്നെ എന്നായിരുന്നു കൈതപ്രം ആരോപിച്ചത്. “72 വയസായ ഞാന്‍ മുടന്തി മുടന്തിയാണ് ദീപക് ദേവിന്റെ സ്റ്റുഡിയോയില്‍ പോയത്. പാട്ട് എഴുതിയിട്ട് എന്നെ പറഞ്ഞയക്കുമ്പോഴുള്ള വേദന എത്രയാണെന്ന് ആലോചിച്ചു നോക്കൂ. എന്റെ വേദന പൃഥ്വിരാജ് ഇത്രയും മണ്ടനായിപ്പോയല്ലോയെന്ന് ആലോചിച്ചാണ്” എന്നായിരുന്നു കൈതപ്രം അന്ന് പറഞ്ഞത്.
അമരം സിനിമയിലെ ‘വികാരനൗകയുമായി’ എന്ന ഗാനം എസ്. പി ബാലസുബ്രമണ്യത്തിനെ കൊണ്ട് പാടിക്കാനായിരുന്നു രവീന്ദ്രൻ മാഷ് ആദ്യം ഉദ്ദേശിച്ചിരുന്നത് എന്നും പിന്നീട് എസ്. പി. ബിയുടെ തന്നെ സ്റ്റുഡിയോയിൽ റെക്കോർഡിങ്ങിന് പോയപ്പോൾ പാട്ടിന്റെ ട്രാക്ക് കേട്ട് എസ്. പി. ബി തന്നെയാണ് യേശുദാസിനെ കൊണ്ട് തന്നെ ഇത് പാടിക്കാൻ പറഞ്ഞതെന്ന് അഭിമുഖത്തിൽ കൈതപ്രം കൂട്ടിചേർത്തു.