മിമിക്രി താരമായി വന്ന്, മലയാളത്തിൽ വില്ലനായും സ്വഭാവ നടനായും സംവിധായകനായും തിളങ്ങി നിൽക്കുന്ന താരമാണ് കലാഭവൻ ഷാജോൺ.
ഇപ്പോഴിതാ മിമിക്രി അവതരണത്തെ പറ്റി സംസാരിക്കുകയാണ് ഷാജോൺ. മിമിക്രിക്കാർ അവതരിപ്പിക്കുമ്പോൾ എപ്പോഴും കുറച്ച് കൂട്ടിയാണ് എല്ലാം ചെയ്യുക എന്നാണ് ഷാജോൺ പറയുന്നത്. കൂടാതെ ടിനി ടോം മമ്മൂട്ടിയെ അവതരിപ്പിക്കുന്നത് കണ്ടാൽ മമ്മൂട്ടി അപ്പോ അടിക്കുമെന്നും ഷാജോൺ പറയുന്നു.
“നമ്മളെ ഒരാൾ അനുകരിക്കുമ്പോൾ നമ്മൾ സ്വയം ധരിച്ചുവെച്ചിരിക്കുന്ന ഒരുപാട് കാര്യങ്ങളുണ്ട്. എന്നാൽ അതായിരിക്കില്ല ശരിക്കുമുള്ളത്. പ്രത്യേകിച്ച് മിമിക്രിക്കാർ ചെയ്യുമ്പോൾ കുറച്ച് കൂടെ കൂട്ടിയാണ് എല്ലാം ചെയ്യുക. അതാണ് ജനങ്ങൾക്ക് കൂടുതൽ ഇഷ്‌ടം.
മമ്മൂക്കയെ കാണിക്കുകയാണെങ്കിലും ഇങ്ങനെ കൈ കുത്തി കാണിക്കുകയല്ലേ. മമ്മൂക്ക എന്നോ ഏതോ ഒരു സിനിമയിൽ ചെയ്ത സാധനമാണത്. നമ്മൾ മിമിക്രികാരെല്ലാം ചെയ്യുന്നത് അങ്ങനെയാണ്. ടിനിയൊക്കെ ചെയ്യുന്നത് കണ്ടാൽ മമ്മൂക്ക അപ്പോൾ അടിക്കും. പക്ഷെ മമ്മൂക്കയ്ക്ക് ഭയങ്കര ഇഷ്‌ടമാണ്. അദ്ദേഹമത് നന്നായി എൻജോയ് ചെയ്യാറുണ്ട്.
ലാലേട്ടനെയാണെങ്കിലും സത്യൻ മാഷിനെയാണെങ്കിലും ചിലർ ചെയ്യുന്നത് കണ്ടാൽ ഞങ്ങൾക്ക് തന്നെ തോന്നും ഇത് കുറച്ച് കൂടുതലാണെന്ന്.
പക്ഷെ അങ്ങനെ ചെയ്‌താലേ കൂടുതൽ ചിരി കിട്ടുകയുള്ളു എന്നത് കൊണ്ടാണ് അത്തരത്തിൽ ചെയ്യുന്നത്. അതൊരിക്കലും ആരെയും അപമാനിക്കാനല്ല.” എന്നാണ് മാതൃഭൂമിക്ക് നൽകിയ അഭിമുഖത്തിൽ ഷാജോൺ പറഞ്ഞത്.