‘കുഞ്ഞിക്കൂനന്‍’ സിനിമയിലെ വില്ലനായി എത്തേണ്ടിയിരുന്നത് താന്‍ ആയിരുന്നുവെന്ന് നടന്‍ കലാഭവന്‍ ഷാജോണ്‍. ചിത്രത്തിലെ ഗരുഡന്‍ വാസു എന്ന വില്ലന്‍ കഥാപാത്രത്തെ സായ് കുമാര്‍ ആണ് അവതരിപ്പിച്ചത്. മേക്കപ്പ് ടെസ്റ്റ് വരെ കഴിഞ്ഞിട്ടും തനിക്ക് ആ കഥാപാത്രം ചെയ്യാനായില്ല എന്നാണ് ഷാജോണ്‍ പറയുന്നത്.

‘ആട്ടം’ എന്ന പുതിയ സിനിമയുടെ പ്രമോഷനുമായി ബന്ധപ്പെട്ട അഭിമുഖത്തിലാണ് ഷാജോണ്‍ സംസാരിച്ചത്. ”കുഞ്ഞിക്കൂനന്‍ സിനിമയില്‍ സായിച്ചേട്ടന്‍ ചെയ്ത വാസു എന്ന കഥാപാത്രം ആദ്യം വന്നത് എനിക്കാണ്. ഞാന്‍ ചെന്ന് മേക്കപ്പ് ടെസ്റ്റ് വരെ കഴിഞ്ഞതാണ്. പട്ടണം റഷീദിക്കയായിരുന്നു മേക്കപ്പ്.”

”ദിലീപേട്ടന്‍ പറഞ്ഞിട്ടാണ് സംവിധായകനെ ചെന്ന് കാണുന്നത്. ബെന്നി ചേട്ടനാണ് തിരക്കഥ. ശശിശങ്കര്‍ സാറായിരുന്നു സംവിധാനം. ആദ്യം പേര് പറഞ്ഞപ്പോള്‍ ശശി സാറിന് എന്നെ മനസിലായില്ലായിരുന്നു. നേരിട്ട് കണ്ടപ്പോള്‍, എന്നെ അറിയാം ഇയാള്‍ ഓക്കെയാണ് എന്ന് പറഞ്ഞു. ഞാന്‍ ദിലീപേട്ടനെയും വിളിച്ച് കാര്യം പറഞ്ഞു.”

”അതിന് ശേഷം റഷീദിക്ക വന്ന് മേക്കപ്പ് നോക്കുന്നു, കോസ്റ്റ്യൂമര്‍ ഡ്രസിന്റെ അളവൊക്കെ എടുത്തു. ഞാന്‍ ഭയങ്കര സന്തോഷത്തോടെയാണ് അന്ന് വീട്ടില്‍ പോയത്. പക്ഷേ അതിന് ശേഷം വിളിയൊന്നും വന്നില്ല. ഞാന്‍ ദിലീപേട്ടനെ വിളിച്ചു ചോദിച്ചപ്പോഴാണ് ഒരു ചെയ്ഞ്ച് വന്നെന്ന് അദ്ദേഹം പറയുന്നത്.”

”കുറച്ച് ദിവസം ഒരു സങ്കടമുണ്ടായിരുന്നു. അതുകഴിഞ്ഞ് റഷീദിക്ക വന്ന് ആ കഥാപാത്രത്തിന്റെ ഗെറ്റപ്പിലുള്ള സായിച്ചേട്ടന്റെ ഒരു ഫോട്ടോ കാണിച്ചു. അപ്പോള്‍ എനിക്ക് തോന്നി ഇത് സായിച്ചേട്ടന്‍ തന്നെ ചെയ്യേണ്ട കഥാപാത്രമാണെന്ന്. പടം കണ്ടപ്പോള്‍ അത് ഒന്നുകൂടി ഉറപ്പിച്ചു” എന്നാണ് കലാഭവന്‍ ഷാജോണ്‍.