മലയാള സിനിമയില്‍ നിന്നും മാറി നില്‍ക്കുകയാണോ എന്ന ചോദ്യത്തോട് പ്രതികരിച്ച് നടന്‍ കാളിദാസ് ജയറാം. മലയാളത്തില്‍ ബാലതാരമായി തുടങ്ങി പിന്നീട് നായകനായി മാറിയ താരമാണ് കാളിദാസ്. അച്ഛന്‍ ജയറാമിന്റെ ചിത്രങ്ങളിലാണ് കാളിദാസ് ബാലതാരമായി എത്തിയത്. എന്നാല്‍ നായകനായി എത്തിയ മലയാള ചിത്രങ്ങള്‍ മിക്കതും ഫ്‌ലോപ്പ് ആയിരുന്നു.
അതുകൊണ്ട് തന്നെ ഇപ്പോള്‍ താരം തമിഴിലാണ് കൂടുതലും അഭിനയിക്കുന്നത്. പുതിയ സിനിമ ‘രജനി’യുടെ പ്രമോഷനുമായി ബന്ധപ്പെട്ട് സംസാരിക്കവെയാണ് കാളിദാസ് മലയാളത്തില്‍ അധികം അഭിനയിക്കാത്തതിനെ കുറിച്ച് പറഞ്ഞത്. മലയാളത്തില്‍ നിന്നും മാറി ഒന്നും നില്‍ക്കുന്നൊന്നുമില്ല എന്നാണ് കാളിദാസ് പറയുന്നത്.
”ബാലതാരമായി ആദ്യം വന്നത് മലയാളത്തിലാണ്, നായകനായി വന്നതും മലയാളത്തിലാണ്. അതുകഴിഞ്ഞ് ചെയ്ത സിനിമകളും മലയാളത്തില്‍ തന്നെയാണ്. ഇപ്പോള്‍ ഒരു ഗ്യാപ് വന്നത് പ്ലാന്‍ ചെയ്യാതെ സംഭവിച്ചതാണ്. തമിഴില്‍ പാവ കഥൈകള്‍ വന്നു, വിക്രം വന്നു, അങ്ങനെ കുറേ സിനിമകള്‍ തമിഴില്‍ ചെയ്തു.”
”ആ സമയത്ത് എനിക്ക് പെര്‍ഫോം ചെയ്യാന്‍ പറ്റുന്ന പോലെത്തെ അല്ലെങ്കില്‍ എനിക്ക് കുറച്ചുകൂടെ കണ്‍വിന്‍സിംഗ് ആയിട്ടുള്ള സിനിമകള്‍ ഒന്നും എനിക്ക് കിട്ടിയില്ല. നേരത്തെ എടുത്ത തീരുമാനങ്ങളും ശരിയായില്ല, അതുകൊണ്ട് ഇനി മലയാളത്തില്‍ ചെയ്യുമ്പോള്‍ നല്ലത് ചെയ്യണം. തിയേറ്ററില്‍ വര്‍ക്ക് ആവാതെ പോയ സിനിമകള്‍ ഉണ്ട്.”
ടടഅതൊക്കെ ചിലപ്പോള്‍ നമ്മളുടെ തീരുമാനം കൊണ്ടോ, അല്ലെങ്കില്‍ എവിടെയെങ്കിലും മിസ് ആയതുകൊണ്ടോ, നമ്മള്‍ ചെയ്ത കഥാപാത്രങ്ങള്‍ നന്നാവാതെ പോയതു കൊണ്ടോ ആകും. അതിപ്പോ എല്ലാ അഭിനേതാക്കള്‍ക്കും സംഭവിക്കാറുണ്ട്” എന്നാണ് കാളിദാസ് പറയുന്നത്.