ജോസഫ് നായിക മാധുരി കുറച്ചു ദിവസങ്ങള്‍ക്ക് മുമ്പ് അവധിയാഘോഷിക്കുന്ന ചില ചിത്രങ്ങള്‍ സോഷ്യല്‍ മീഡിയയില്‍ പങ്കുവച്ചതിനെതിരെ ഒരു കൂട്ടം സദാചാരവാദികള്‍ രംഗത്തെത്തിയിരുന്നു. ഇതിന് മറുപടിക്കുറിപ്പിട്ടതിന് പിന്നാലെ മാധുരി ചിത്രങ്ങള്‍ നീക്കം ചെയ്യുകയും ചെയ്തു.
ഇപ്പോഴിതാ മാധുരി ചിത്രം നീക്കം ചെയ്തതിനെതിരെ രംഗത്തെത്തിയിരിക്കുകയാണ് നടി കസ്തൂരി. “നിന്റെ അവധിക്കാലമാണ്, നിന്റെ ജീവിതമാണ്. നീയാണ് ബിക്കിനി ധരിച്ചിരിക്കുന്നത്. നീ വാങ്ങിയ ബിയറാണ് അത്. പിന്നെന്തിന് ട്രോളുകള്‍ക്ക് വഴങ്ങി കൊടുക്കണം? എന്തിന് ചിത്രങ്ങള്‍ നീക്കം ചെയ്യണം? ചിലര്‍ക്ക് വേണ്ടി നഷ്ടപ്പെടുത്താനുള്ളതല്ല സന്തോഷം, സധൈര്യം നീങ്ങൂ” എന്നാണ് മാധുരിയുടെ ചിത്രങ്ങള്‍ പങ്കുവച്ച് കസ്തൂരി സമൂഹമാധ്യമത്തില്‍ കുറിച്ചത്.
കടല്‍ തീരത്ത് ബിക്കിനി അണിഞ്ഞ് നില്‍ക്കുന്ന ചിത്രം പങ്കു വച്ച മാധുരിക്ക് നിരവധി അശ്ലീല കമന്റുകളാണ് ലഭിച്ചത്. ബാത്തിംഗ് സ്യൂട്ടില്‍ നില്‍ക്കുന്ന ഒരു അവധിക്കാല ചിത്രം പങ്കു വച്ചാല്‍ ഇതാണോ അവസ്ഥ..? വെറുതെ മലയാളികള്‍ക്ക് നാണക്കേടുണ്ടാക്കരുത്. ഇങ്ങനെയായിരുന്നു അതിനോടുള്ള മാധുരിയുടെ പ്രതികരണം.