തെലുങ്ക് താരം നാനിയോടും നടന്റെ മകനോടുമുള്ള അടുപ്പത്തെ കുറിച്ച് പറഞ്ഞ് നടി കീര്‍ത്തി സുരേഷ്. ‘നേനു ലോക്കല്‍’ എന്ന ചിത്രം മുതല്‍ നാനിയുമായി കീര്‍ത്തിക്ക് സൗഹൃദമുണ്ട്. ‘ദസ്‌റ’ ആണ് ഇരുവരും ഒന്നിച്ച് അഭിനയിച്ച ചിത്രം. നാനിയും അദ്ദേഹത്തിന്റെ കുടുംബവുമായി തനിക്ക് നല്ല ബന്ധമുണ്ട് എന്നാണ് കീര്‍ത്തി സിനിമാ വികടന് നല്‍കിയ അഭിമുഖത്തില്‍ പറയുന്നത്.
നാനിയോട് ഒരു മണിക്കൂര്‍ സംസാരിച്ചാല്‍ അതില്‍ 59 മിനിറ്റും സംസാരിക്കുക സിനിമയെ കുറിച്ചാകും. സിനിമയോട് വളരെ പാഷനുണ്ട് അദ്ദേഹത്തിന്. ഹൈദരാബാദ് പോകുമ്പോഴെല്ലാം നാനിയുടെ വീട്ടില്‍ പോകും. നാനിയുടെ മകനുമായും ഞാന്‍ നല്ല സൗഹൃദത്തിലാണ്. കുഞ്ഞായിരിക്കുമ്പോള്‍ അവന്റെ ഗേള്‍ഫ്രണ്ട് ഞാനാണ് എന്നാണ് പറയാറുള്ളത്.
പിറന്നാളിന് അവന്റെ വോയ്‌സ് മെസേജ് ഒക്കെ വരും. കീര്‍ത്തി അത്ത എന്നാണ് നാനിയുടെ മകന്‍ എന്നെ വിളിക്കാറുള്ളത്. ഞാന്‍ ഡൗണ്‍ ആയിരിക്കുമ്പോള്‍ അവന്റെ വോയിസ് മെസേജ് പത്ത് തവണ കേള്‍ക്കും. അതോടെ ശരിയാകും. ഞാന്‍ അവിടെ പോകുമ്പോഴെല്ലാം എന്റെ കവിളില്‍ കടിക്കും.
അത്തരത്തിലുള്ള അവന്റെ ഒരുപാട് ഫോട്ടോകള്‍ എന്റെ കയ്യിലുണ്ട്. അവന്‍ നല്ലൊരു വൈബാണ്. നാനിയുടെ കുടുംബം എന്റെ കുടുംബം പോലെയാണ് തോന്നാറുള്ളത് എന്നാണ് കീര്‍ത്തി സുരേഷ് പറയുന്നത്. അതേസമയം, ‘സൈറണ്‍’ ആണ് കീര്‍ത്തിയുടെതായി ഒടുവില്‍ തിയേറ്ററില്‍ എത്തിയ ചിത്രം.
ബ്രഹ്‌മാണ്ഡ സിനിമയായ ‘കല്‍ക്കി 2898എഡി’യില്‍ കീര്‍ത്തി ഡബ്ബിംഗ് ആര്‍ട്ടിസ്റ്റ് ആയും എത്തിയിരുന്നു. പ്രഭാസിന്റെ കഥാപാത്രത്തിന്റെ വാഹനമായ ബുജ്ജിയുടെ ശബ്ദമായാണ് കീര്‍ത്തി കല്‍ക്കിയില്‍ സാന്നിധ്യം അറിയിച്ചത്. ‘ബേബി ജോണ്‍’ എന്ന ചിത്രത്തിലൂടെ ഹിന്ദിയിലും അരങ്ങേറ്റം കുറിക്കാന്‍ ഒരുങ്ങുകയാണ് കീര്‍ത്തി.