ഹേമ കമ്മിറ്റി റിപ്പോര്‍ട്ടിനെ പരിഹസിച്ച് നടനും ബിജെപി നേതാവുമായ കൃഷ്ണകുമാര്‍. ഭാര്യ സിന്ധുവിന്റെ യൂട്യൂബ് ചാനലിലൂടെയാണ് കൃഷ്ണകുമാര്‍ റിപ്പോര്‍ട്ടിനെ കളിയാക്കികൊണ്ട് സംസാരിച്ചത്. ‘നീ വാതിലിലൊന്നും മുട്ടിയേക്കല്ലേ’ എന്ന് പറഞ്ഞാണ് കൃഷ്ണകുമാറിന്റെ പരിഹാസം.
”നീ ഓരോന്നൊന്നും പറയല്ലേ, ഓരോ കമ്മീഷനൊക്കെ വന്നുകൊണ്ടിരിക്കുന്ന കാലമാ. ഞാനവിടെ ഇരിക്കുമ്പോള്‍ നീ വാതിലിലൊന്നും മുട്ടിയേക്കല്ലേ” എന്നാണ് വീട്ടിലെ ചില കാര്യങ്ങളെ കുറിച്ച് സംസാരിച്ചതിന് പിന്നാലെ കൃഷ്ണകുമാര്‍ പൊട്ടിച്ചിരിച്ചുകൊണ്ട് പറയുന്നത്.
സിന്ധുവും സമാനമായ പ്രതികരണമാണ് വീഡിയോയില്‍ നടത്തുന്നത്. ഹേമ കമ്മിറ്റി റിപ്പോര്‍ട്ട് പുറത്തുവന്നതിന് പിന്നാലെ പൊട്ടിപുറപ്പെട്ട സ്ത്രീ വിരുദ്ധ-പരിഹാസ ട്രോളുകളുടെ അതേ രൂപത്തിലാണ് കൃഷ്ണകുമാറിന്റെയും കമന്റ് എന്ന വിമര്‍ശനം ഉയര്‍ന്നിട്ടുണ്ട്.
അതേസമയം, ഓഗസ്റ്റ് 19ന് ആണ് ഹേമാ കമ്മിറ്റി റിപ്പോര്‍ട്ട് പുറത്തുവന്നത്. ഇതിന് പിന്നാലെ നടിമാരും നടന്‍ കൊല്ലം തുളസിയും തങ്ങളുടെ വാതിലില്‍ മുട്ടി വിളിക്കാറുള്ള സംവിധായകരെയും നിര്‍മ്മാതാക്കളെയും കുറിച്ച് വെളിപ്പെടുത്തലുകള്‍ നടത്തിയിരുന്നു.