അഭിമുഖത്തിനിടെ അവതാരകനോട് ദേഷ്യപ്പെട്ട് നടി കുളപ്പുള്ളി ലീല. കസ്തൂരിമാന്‍, പുലിവാല്‍ കല്യാണം, ബസ് കണ്ടക്ടര്‍ എന്നിങ്ങനെ നിരവധി സിനിമകളില്‍ ദേഷ്യപ്പെടുന്ന രംഗങ്ങളില്‍ കുളപ്പുള്ളി ലീല അഭിനയിച്ച സീനുകള്‍ ട്രോളുകളില്‍ നിറയാറുണ്ട്. ‘പ്ഫാ’ എന്ന് ആട്ടുന്ന രംഗം അഭിനയിക്കാമോ എന്ന് ചോദിച്ചപ്പോഴാണ് താമശയ്ക്ക് നടി ദേഷ്യപ്പെടുന്നതായി അഭിനയിച്ചത്.
‘അനക്ക് എന്തിന്റെ കേടാ’ എന്ന ചിത്രത്തിന്റെ പ്രമോഷന്റെ ഭാഗമായി വെറൈറ്റി മീഡിയക്ക് നല്‍കിയ അഭിമുഖത്തിനിടെയാണ് സംഭവം. ”ചേച്ചി ആ സിനിമയില്‍ ഒക്കെ കാണിക്കുന്ന ‘പ്ഫാ’ എന്നൊരു ആട്ടല്‍ ഇല്ലേ, അതൊന്ന് കാണിക്കുമോ, നേരിട്ട് കാണാന്‍ ആഗ്രഹം” എന്നാണ് അവതാരകന്‍ ചോദിക്കുന്നത്.
”പിന്നെ നിങ്ങളെ നേരിട്ട് ആട്ടാന്‍ ഇരിക്കുവല്ലേ ഞാന്‍, എന്നിട്ട് എന്നെ പിടിച്ച് വല്ല കുതിരവട്ടത്തും കൊണ്ടുപോവാന്. എന്നിട്ട് പിന്നെ പറയും ഈ തള്ളയല്ലേ, ആ തള്ളയ്ക്ക് ഒരു ലക്കും ലഗാനുമില്ല, എവിടെ വച്ച് എന്ത് പറഞ്ഞാലും ചെയ്യുമെന്ന്..” നടി പറഞ്ഞതോടെ ”എന്നോട് പറഞ്ഞോ എന്തേലും ഒരു ഡയലോഗ്” എന്ന് അവതാരകന്‍ പറയുന്നുണ്ട്.
ഇതോടെ കൂടുതല്‍ ദേഷ്യപ്പെടുന്നത് പോലെ കുളപ്പുള്ളി ലീല അഭിനയിക്കുകയായിരുന്നു. ”അയ്യാ, പിന്നെ.. സൗകര്യമില്ല, ഞാന്‍ ഇപ്പോ അങ്ങനൊരു ഡയലോഗ് പറഞ്ഞില്ലെങ്കില്‍ നീ ഇപ്പോ വന്ന എന്നെ കൊണ്ട് പറയിപ്പിക്കാന്‍ പറ്റ്വോ? എനിക്ക് സൗകര്യമില്ല. ഈ ഡയലോഗ് പറയാനും ആട്ടാനും അല്ലല്ലോ നിങ്ങള്‍ എന്നെ വിളിച്ചത്.”
View this post on Instagram
”അല്ലല്ലോ സിനിമയുടെ പ്രമോഷന് അല്ലേ.. പിന്നെ എന്ത് വിചാരിച്ചാണ് നിങ്ങള്‍ എന്നോട് ആട്ടാനും ഡയലോഗ് പറയാനും പറയുന്നത്. അല്ല അത് എന്ത് അര്‍ത്ഥത്തില്‍ ആണെന്ന് പറ. നിങ്ങളോട് പറഞ്ഞാല്‍ പറഞ്ഞ കാര്യം ചെയ്താ മതി. അതിന്റെ അപ്പുറം ചെയ്യാന്‍ ആര്‍ക്കും ഓഡര്‍ ഇല്ല. മനസിലായോ അത്” എന്ന് പറഞ്ഞ് ‘പ്ഫാ’ എന്ന് ആട്ടുകയായിരുന്നു.
Read more
ഇത് കണ്ട് അവതാരകന്‍ ഞെട്ടിത്തരിച്ച് ഇരിക്കുന്നതും വീഡിയോയില്‍ കാണാം. പിന്നീട് കുളപ്പുള്ളി ലീല ചിരിച്ച് രംഗം ശാന്തമാക്കുകയും ചെയ്തു. താന്‍ പേടിച്ചു പോയെന്നും അവതാരകന്‍ പറയുന്നുണ്ട്. ഈ അഭിമുഖത്തിന്റെ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്.
