അഫ്ഗാനിസ്ഥാനില്‍ പൊലീസ് ഉദ്യോഗസ്ഥന്‍ കൂടിയായിരുന്ന കോമഡി താരത്തെ തങ്ങള്‍ കൊന്നതാണെന്നു താലിബാന്‍ സമ്മതിച്ചതിന് പിന്നാലെ വലിയ വിമര്‍ശനമാണ് ഉയരുന്നത്. കൊലപാതകത്തില്‍ പങ്കില്ലെന്ന നിലപാടാണ് താലിബാന്‍ ആദ്യം സ്വീകരിച്ചിരുന്നത്. ഖാസ സ്വാന്‍ എന്നറിയപ്പെട്ടിരുന്ന ഫസല്‍ മുഹമ്മദ് എന്ന മുന്‍ പൊലീസ് ഉദ്യോഗസ്ഥനെ തട്ടിക്കൊണ്ടുപോകുന്ന വിഡിയോ വൈറലായതോടെ താലിബാന്‍ കുറ്റം സമ്മതിക്കുകയായിരുന്നു. ഇപ്പോഴിതാ ലോകശ്രദ്ധ നേടിയ വിഷയത്തില്‍ പ്രതികരണവുമായി എത്തിയിരിക്കുകയാണ് സംവിധായകന്‍ എം എ നിഷാദ്.
മനസ്സാക്ഷി മരവിച്ച,അറും കൊലയാളികളായ,നരഭോജികളാണ് താലിബാന്‍ തീവ്രവാദികളെന്ന് അദ്ദേഹം ഫെയ്‌സ്ബുക്കില്‍ കുറിച്ചു.
അറും കൊലയുടെ താലിബാനിസം..
മനുഷ്യന്‍ ചിരിക്കുന്നത്,ഇഷ്ടമല്ലാത്ത
ഒരേയൊരു വര്‍ഗ്ഗം,തീവ്രവാദികളാണ്…
താലിബാന്‍ തീവ്രവാദികളാല്‍ കൊല്ലപ്പെട്ട
ഹാസ്യ നടന്‍,ഫസല്‍ മുഹമ്മദ്,എന്ന കലാകാരന് രക്തസാക്ഷിയായത്,
ജനങ്ങളെ ചിരിപ്പിച്ചത് കൊണ്ടാണ്..
മനസ്സാക്ഷി മരവിച്ച,അറും കൊലയാളികളായ,നരഭോജികളാണ്
താലിബാന്‍ തീവ്രവാദികള്‍…
ലോകം മുഴുവന്‍ അശാന്തിയുടെ,ഇരുണ്ട
കാലത്തേക്ക് നയിക്കാന്‍,സദാ ജാഗരൂകരായി കരുക്കള്‍ നീക്കുകയാണ്
ഇമ്പീരിയലിസ്റ്റുകളും,ഫാസിസ്റ്റുകളും
,തീവ്രവാദികളും…
കലാകാരന്മാരെ അവര്‍ക്ക് ഭയമാണ്….
തൂലിക പടവാളാക്കി,ഇവര്‍ക്കെതിരെ
പ്രതികരിക്കുക തന്നെ ചെയ്യും കലാകാരന്മാര്‍…
താലിബാന്‍ തീവ്രവാദികള്‍ കൊലപ്പെടുത്തിയ,ഫസല്‍ മുഹമ്മദ്
എന്ന കലാകാരന്,ആദരാഞ്ജലികള്‍ !