മമ്മൂട്ടിയെ വേദിയിലിരുത്തി ‘ഭ്രമയുഗം’ സ്പൂഫ് ചെയ്ത് എയറില്‍ ആയിരിക്കുകയാണ് ടിനി ടോം. വനിത ഫിലിം അവാര്‍ഡിന്റെ ഭാഗമായാണ് ടിനി ടോമിന്റെ നേതൃത്വത്തില്‍ ഭ്രമയുഗം സ്പൂഫ് സ്‌കിറ്റ് അവതരിപ്പിച്ചത്. ട്രോളുകളാണ് ഈ സ്പൂഫ് വീഡിയോക്ക് ലഭിച്ചു കൊണ്ടിരിക്കുന്നത്. ചിത്രത്തില്‍ മമ്മൂട്ടിയുടെ കഥാപാത്രം കൊടുമണ്‍ പോറ്റി ആയിരുന്നു.
പെടുമണ്‍ പോറ്റി എന്ന പേരിലാണ് ടിനി ടോം സ്‌കിറ്റ് അവതരിപ്പിച്ചത്. ടിനി ടോമിനെ ട്രോളി രംഗത്തെത്തിയിരിക്കുകയാണ് സംവിധായകന്‍ എംഎ നിഷാദ് ഇപ്പോള്‍. ”ജസ്റ്റ് ഫോര്‍ ഹൊറര്‍. നമ്മളെല്ലാം കഷ്ടകാലത്തെപ്പറ്റി പരാതി പറയും.. അപ്പോ നമ്മള്‍ ടിനി ടോമിന്റെ ഭ്രമയുഗം സ്‌കിറ്റ് കാണേണ്ടി വന്ന മമ്മൂക്കയെപ്പറ്റി ഓര്‍ക്കുക.”
”അത്രയൊന്നും ഈ ജീവിതത്തില്‍ ആരും അനുഭവിച്ചിട്ടില്ലല്ലോ” എന്നാണ് എംഎ നിഷാദ് സ്പൂഫിന്റെ ദൃശ്യങ്ങള്‍ പങ്കുവച്ച് സോഷ്യല്‍ മീഡിയയില്‍ കുറിച്ചിരിക്കുന്നത്. പെടുമണ്‍ പോറ്റിയായുള്ള ടിനിയുടെ പ്രകടനം നോക്കിയിരിക്കുന്ന മമ്മൂട്ടിയുടെ ചിത്രമാണ് സംവിധായകന്‍ പങ്കുവച്ചത്.
ടിനി ടോമിനൊപ്പം ബിജു കുട്ടനും ഹരീഷ് കണാരനുമായിരുന്നു സ്‌കിറ്റില്‍ പങ്കെടുത്ത മറ്റ് താരങ്ങള്‍. വോട്ട് തേടി ഒരു രാഷ്ട്രീയക്കാരന്‍ മനയിലെത്തുന്നതും തുടര്‍ന്നുണ്ടാകുന്ന സംഭവങ്ങളുമാണ് രസകരമായി ഇവര്‍ അവതരിപ്പിച്ചത്.